Kultura sa kinawatay
Imbes mangayo og pasaylo nga duha ka adlaw sa panghambog sa iyang State of the Nation Address (SONA) nga nakatukod ang iyang administrasyon og 5,500 ka flood control projects nalumos sa lapad nga baha ang Metro Manila, si Presidente Ferdinand Marcos Jr. nidalidali sa pagpangita og lusot.
Imbes mamalandong nganong nalubong na sab ang tibuok rehiyon sa baha sa bagyong Carina, ug imbes mokumpisal nga ang gobiyerno wa makat-on og leksiyon sa baha sa bagyong Ondoy 25 ka tuig ang nilabay, si Marcos nitulisok sa kinaiyahan ug sa katawhan.
* * *
Imbes susihon hain ang mga proyekto batok sa baha nga gibuboan og binilyon ka pesos sa Department of Public Works and Highways (DPWH) ug local government units (LGUs), nga sa kuwentada sa Senado niabot og kapin sa bilyon ka pesos ang budget kada adlaw sa duha ka tuig sa iyang administrasyon, si Marcos nibasol sa climate change.
Way nakapahinumdom niya nga ang binilyon ka pesos nga gigahin para sa flood control projects gitumong sa pagsagang sa kinakusgang uwan ug bagyo nga resulta sa mas paspas nga pag-init sa planeta.
* * *
Imbes susihon kansang pribadong mga bolsa ang niburot sa makalilisang nga budget batok sa baha, nga mas dako pa kay sa gahin sa Department of National Defense (DND), o Department of Social Welfare and Development (DSWD), o Department of Agriculture (DA), si Marcos nipasangil sa katawhan nga nagpataka og labay sa ilang basura.
Way nakahunghong niya nga ang executive department nga iyang gipangulohan maoy napakyas pagsilot sa mga naghugaw-hugaw sa palibot, labi nang mga bilyonaryo niyang mga barkada.
* * *
Tambag sa atong katiguwangan mao nga ang unang lakang sa pagsulbad sa problema mao ang pagsubay sa gamot nga mga hinungdan. Ang pait nga kamatuoran mao nga ang binilyon ka pesos nga gigahin sa Malakanyang ug sa Kongreso batok sa baha maoy paboritong tinubdan sa pangurakot sa mga politiko kay mas lisod nga makit-an ug mapamatud-an ang ilang mga krimen nga nalubong sa yuta.
Mas pait nga si Marcos nahibawo unsay tinuod nga problema. Pero di siyang kabadlong, kay wa siyay plano nga maghilas-hilas paghunong, sa kultura sa makalilisang nga kinawatay nga gipasiugdahan sa iyang mga ginikanan.
* * *
- Latest
