Gipatay sulod sa jeep de pasaherohan

Manamilit naman unta ang tuig 2024 apan nagbilin kini og makapakitbi sa atay ug makapanglimbawot sa balhibo nga panghitabo. Usa ka babaye ang gihunosan sa iyang kinabuhi sulod sa gisakyan niini nga modernized PUJ dapit sa Barangay Ibo sa dakbayan sa Lapu-Lapu pasado alas 9 sa gabii niadtong Sabado.

Nadakpan ang iyang bana kinsa maoy gitumbok nga mihimo sa krimen kinsa giingong mihansak og kutsilyo sa lawas sa biktima sa makadaghang higayon hangtud nga nakabsan kini sa kinabuhi.

Pastilan nahitabo kini sulod pa gyud sa usa ka public transportation. Wala nalang gyuy mga pasahero o ang driver ug konduktor ang nagpakabana sa pagluwas sa biktima? Makasabot hinuon kita nga nahadlok sila nga sila na pud ang dunggabon sa suspek.

Daan man kuno nga nagpasidaan ang asawa nga dili pasakyon ang iyang bana kay seguro nagtuo na kini nga dunay dautang buhaton kaniya. Apan nganong wala man kini paminawa sa driver ug sa konduktor. Kay nag-apas sila sa plete gikan sa pasahero? Unta didto pa lang gihapit na nila ang suspek sa police station kon namugos kini sa pagsakay sa jeeep.

Kita usahay nasobrahan sa kinaiya nga dili manginlabot sa problema sa uban ilabi na kong naglambigit kini sa personal nga problema sa uban, moingon dayon kita nga dili ta maglabotlabot kay ila nang problema. Lahi na kining ingon niini nga sitwasyon kay kinabuhi na ang nakataya.

Gani buhi man kuno ang pasahero dihang mibiya ang suspek pero wala man ni usa ang nagpakabana sa pagdala niini sa hospital. Naglihok pa ang biktima pero wala man dad-a sa PUJ nga iyang gisakyan ngadto sa tambalanan nga naa naman unta kini sa sulod sa sakyanan. Mora’g gipaabot nalang nila nga mabugtoan sa ginhawa. Gitan-aw nila kini nga namatay ug wala silay nahimo.

Maayo lang mokondenar sa kriminal pero unsa man ang ilang nahimo pagluwas sa biktima? Bisan og wala nay paglaum nga maluwas kini tungod sa grabeng samad nga naangkon apan gipakita unta sa mga tawo nga naglibot kaniya ang pagpakabana sa iyang pagkatawo, dili pasagdan nga mabugtoan nalang sa kinabuhi.

Ang bana nadakpan man sa mga otoridad apan hugot nga mihimakak nga siya ang nagpatay sa iyang asawa kay matud niya tua siya sa iyang duty isip gwardiya sa usa ka private school ug duna siyay mga saksi niadtong tungora nga wala siya molakaw.

Ambot lang kong tinuod ba ang iyang paghimakak. Hinuon masuta kini sa nagpadayon nga imbistigasyon sa kapolisan. Mokabat sa 12 ka tuig na silang nagbuwag ug wala na kuno siyay tinguha nga makigbalik sa iyang asawa ug labaw na nga wala siyay motibo nga patyon kini.

Kong dili siya ang kriminal, kinsa man? Walay malilong karon mogawas gyud ang kamatuoran ilabi na nga duna nay mga CCTV ug ang mga saksi sa nahitabong krimen niadtong adlawa.