Lipat-lipat sa budget

Gipirmahan na ni Presidente Ferdinand Romualdez Marcos Jr. (PBBM) ang General Appropriations Act o 2025 National Budget nga nagkantidad og P6.326 trilyon kagahapong adlawa, Lunes, Disyembre 30, 2024. Apan ang gipirmahan nga nasudnong gahin gikaltasan kini og P194 bilyones human si PBBM mihimo og pag usab sa gahin sa kataposang minuto. Ang gikaltas sa Presidente mao ang gigahin nga iyang gikonsiderar nga wala mahisubay sa iyang mga programa ug priorities.

Una nang mipagawas og pahimangno si Executive Secretary Lucas Bersamin sa posibling pag-veto ni PBBM sa 2025 national budget tungod kay wala kini mahasubay sa programang giprioridad sa Presidente. Apan sa makuting pagtuon nahukman sa Presidente nga tangtangon na lamang ang P194 bilyones sa nasudnong gahin kay wala kini masubay sa mga programa sa Presidente ina kay i-veto o dili pirmahan sa Presidente  nga makamugna lamang kini og kalangay sa pagpalabang sa 2025  nasudnong gahin.

Busa gikaltasan nalama g niini ang budget sa Department of Public Works and Highways ug ang sa unprogrammed budget nga giumentohan sa Kongreso og 300 porsiyento.

Wala kaltasi sa Presidente ang P26 bilyones nga gahin alang sa Ayuda para sa Kapus ang Kita (AKAP), hinuon dili na magsulo sa pagpatuman niini ang DSWD tungod kay moapil na sa pagpatuman niini ang DOLE ug NEDA.

Lipat-lipat ra gihapon ang budget kay ang magbuot sa pagpatuman sa P26 bilyones nga budget sa AKAP ang mga kongresista lang gihapon.

Sa pagpirma ni PBBM sa 2025 national budget giuyonan ra niini ang gipaburot nga budget sa kongreso nga gikan sa P33 bilyones kapin gihimo nang P50 bilyones nga wala nila pahibawa ang katawhan asa nila kuhaa ang gipaburot sa ilang budget. Lipat-lipat ra.