EDITORYAL -   Mora og naibta’g tunok

Karong gimando ni Presidente Ferdinand Marcos Jr. ang pag-ban sa Philippine Offshore Gaming Operation sigurado nga adunay daghang mawad-an og trabaho nga mga Pilipino ug dunay buhis nga unta makolekta pa ang mawala.

Apan kining tanan dili kabayran sa anihong kalinaw dinhi sa nasud. Ang POGO gigamit sa pipila ka mga kriminal gikan sa China nga nakigkunsabo sa mga kriminal sab dinhi sa Pilipinas.

Gani naobserbahan nga sukad sa ilang pag-abot dinhi sa POGO kinilo na ang mga shabu nga nakuha sa mga police operations. Daghang mga pekeng birth certificates nga nanggawas ug kasagaran didto sa Davao nakuha sa mga otoridad. Mikusog sab ang impluwensiya sa China sa sud mismo sa gobiyerno tungod sa mga opisyales nga dunay personal nga interes.

Samtang nabutang sab sa peligro ang seguridad sa nasud tungod sa pagdagsa sa mga Chinese nationals nga nagpakaaron ingnong nagtrabaho sa mga POGO ingon man turista apan diay to nangispeya na sa Pilipinas.

Dili ikalimod nga dunay nakolektang buhis ang gobiyerno sa ilang operasyon, apan posibleng mas dako pa ang kwartang nagtuyok sa likod aning POGO gumikan aning ilang mga krimen nga gidala dinhi.

Usa pa, kaning POGO dako ang purohan nga maoy tinubdan sa mga hugaw nga kwarta para isuporta ngadto sa mga lokal ug nasyonal nga mga kandidato aron makakuha sila og pabor kun sila modaog, mao kini ang nahitabo sa nagkalabay nga eleksyon.

Sanglitanan niini si Bamban suspended mayor Alice Guo kinsa ang tinuod nga pagkatawo dili siya Pilipino kondili usa ka Chinese national ug ang pangalan si Guo Hua Ping . GIdudahan siya nga usa ka espiya sa China.

Sa pagpahunong kanila, naibta’g tunok ang  Pilipinas nga posibleng magdala og impeksyon sa  tibuok nasud.

Kinahanglan lang nga atimanon sa gobiyerno ang mga Pilipinong mawad-an og trabaho pagsirado sa POGO.