POGOs sa Sugbo
=====Ang gitakdang pagduaw sa Sugbo ni Interior ug Local Government Secretary Benhur Abalos sa sunod semana, aron pagsusi sa nadawat niyang kasayuran nga dunay naglihok nga Philippine Offshore and Gaming Operators (POGO) dinhi, makapapugwat sa lokal nga mga opisyal ug kapolisan.
Ang mga polis nga nipasalig na nga wa silay nabantayan nga POGO operations sa Sugbo napugos sa pagpasabot nga nagpadayon pa ang ilang monitoring human sa pahibawo ni Abalos. Mga mayor magkara-kara sab pagsusi sa ilang mga nataran aron di mahisama sa mga mayor sa Luzon nga nagpa-goryo-goryo sa ilang POGOs.
* **
Abunda ang gilista sa Philippine Amusement and Gaming Corporation (PAGCOR) nga mga timaan sa ilegal nga POGO hubs:
Tag-as ang mga koral nga giputos og tunukon nga mga alambre sa ibabaw, gilibotan og daghang guwardiya ug CCTV;
Nagsiga ang mga sugo sa buildings sa sud sa compound bisan bisan sa lawom nang gabii ug sayong kadlawon;
Daghang langyaw nga mga trabahante ang magsud-gawas sa sakay sa vans nga itom ang mga bildo;
Way hunong ang food deliveries sa main gate; ug
Agresibo ang pagpang-recruit og mga trabahante pinaagi sa posters sa koral ug sa social media.
* **
Gilista sab sa Department of Interior and Local Government ang mga paagi nga makasusi sa local government units sa kadudahan nga buildings bisan way search warrant sa korte:
Ang business permit section makasud sa mga kompaniya aron pagtan-aw duna bay permiso gikan sa City Hall o munisipyo;
Ang health department makalili kon nakakuha ba og sanitary permit ug ubang panginahanglan sa City Hall o munisipyo;
Ang building office makasubay unsa kalig-on ang istruktura ug kon duna bay building ug occupany permits; ug bisan
Ang kabomberohan maka-imbestigar dunay bay fire alarm ug detection systems ang buildings.
* * *
Angay’ng ipasabot ni Cebu City Acting Mayor Raymond Garcia atol sa pagduaw ni Abalos diin gikan ang iyang kasayuran nga dunay lisensiyadong POGOs sa Cebu City. Niinsistir ang PAGCOR nga wa silay gitugotan gawas sa Metro Manila ug Cavite.
Atubangan sa pangangkon sa kapolisan nga wa nay aktibo sa lima ka kanhi POGOs sa Sugbo, sibaw ang mga taho nga dunay POGOs sa Cebu City ug Mandaue City.
* * *
- Latest
