Happy 105th anniversary, The Freeman!

Karong adlawa 105 ka tuig na ang milabay nahimugso ang  usa sa labing tinamod ug kasaligan nga mantalaan dinhi sa Sugbo---ang The Freeman.

Ang inila ug batikang abogado nga si Don Paulino Gullas maoy nagtukod sa The Freeman niadtong Hulyo 1919. Nagsugod kini sa iyang mga hulad isip senimana nga mantalaan sa wala pa nahimong inadlaw human sa duha ka tuig sukad sa pagkatukod niini.

Niadtong 1934 napugos paghunong sa iyang operasyon ang The Freeman human mosalmot sa politika si Don Paulino. Apan niadtong 1965, ang pag-umangkon ni Don Paulino nga si Jose “Dodong” Gullas nakahukom sa pagbuhi pagbalik sa mantalaan.

Sukad niadto hangtod karon, bisan sa kadaghan sa mga pagsuway, nagpabiling lig-on ug nagpadayon sa pangalagad sa publiko ang The Freeman dili lang pinaagi sa paghatod og kasaligan, patas, ug tinuod nga mga balita kon dili lakip na sa paghatod og kalingawan ug edukasyon.

Nahimo sab nga taytayan ang mantalaan aron matabangan ang mga kabus nga nagkinahanglan pinaagi sa The Freeman Foundation. Sulod sa kapin na sa usa ka siglo nahimong saksi ug kabahin ang The Freeman sa mga mahinungdanon nga panghitabo nga nahimo nang tipik sa kasaysayan sa Sugbo, nasud ug kalibutan.

Ang The Freeman wala lang mahimong saksi sa kalamboan sa Sugbo ug sa nasud, nahimo sab kini nga aktibong kabahin sa pagbadlong sa mga kahiwian sa kagamhanan. Ang iyang impluwensiya nahimong importanteng kabahin sa pag-umol og mga polisiya sa gobiyerno. Ang way kahadlok ug patas nga pagpaabot sa mga kasayuran ngadto sa publiko nakatampo sa pagpatuman og mga kausaban sa kagamhanan.

Taliwala sa daghang mga pangagpas nga hingpit nang mahanaw ang mantalaan nunot sa pagtumaw sa social media, nagpabiling lig-on ug wala matarog ang The Freeman. Mas nilig-on ug milapad pa ang impluwensiya niini dihang nahimo kining kabahin sa labing dako nga network sa mantalaan sa nasud niadtong 2004.

Isip kabahin sa The Freeman, daghang salamat sa tanang advertisers ug subscribers nga padayong misalig sa mantalaan.