Komedyang way giganahan
Ang pagpusil ni kanhi US President Donald Trump sa campaign rally sa Pennsylvania maoy labing uwahi nga pahinumdom ni Bise Presidente Sara Duterte Carpio: Unsa ka way buot ang komedya sa pagtudlo sa iyang kaugalingon nga designated survivor atol sa State of the Nation Address (SONA) ni Presidente Ferdinand Marcos Jr.
Labihan katandugon ang panahon nga wa nay makaseguro unsa ang sunod nga mga panghitabo. Makiangayon lang nga pahinumdoman ang tanang hingtungdan, ang mas dagko og puwesto ug influencia kinahanglan nga mas magmatngon, sa di pagpatuyang sa ilang sinultihan.
* * *
Kon ang komedya sa bise presidente gitumong aron nga kahisgutan pa siya, tungod sa kabalaka nga ang pagbiya sa gabinete makapalayo niya gikan sa nasudnong atensiyon, mahimong makapangangkon siya og kalamposan. Ang bisan unsa diay niyang isulti makapatay-og pa sa nasud ug makadani pa sa pagtagad sa kadaghanan.
Pero ang atensiyon nga nakuha di makatabang niya. Ang iyang komedya gi-piyestahan sa iyang mga kaatbang nga maoy ebidensiya sa iyang kataphaw ug binata nga pataka ug kakuwang og saktong kabuot isip ikaduha nga labing taas nga opisyal sa nasud.
* * *
Nakapasamot sa kalaw-ay sa komedya mao nga nisunod kini sa gibalikbalik nga awhag sa rallies sa nagkalainlaing bahin sa nasud sa iyang amahan nga si kanhi Presidente Rodrigo Duterte ug kanhi kontra pero karon alyado na nga si kanhi House Speaker Pantaleon Alvarez:
• Nga ang kasundalohan ug kapolisan mobakwi sa ilang suporta sa administrasyon ni Presidente Ferdinand Marcos Jr.; aron
• Nga mopuli sa Malakanyang ug moluwas sa nasud gikan sa kaalaotan ang, nakatag-an ka, bise presidente.
* * *
Sa iyang pagka-biktima sa pagpamusil nakaangkon si Trump sa simpatiya di lang sa iyang mga dumadapig kon dili hasta na sa labing higpit niyang mga kaatbang. Sama ni US President Joe Biden nga nikondenar dayon sa pagpamusil ug nisuspenso sa iyang campaign ads.
Sa pagkomedya nga siya ray mabuhi kon mapatay ang tanang opisyal sa gobyerno nga motambong sa SONA karong Hulyo 22, si Bise Presidente Carpio di kapaabot og simpatiya. Di mopakpak ang mga politiko nga gusto pang mabuhi. Labaw nang di mo-abiba ang mga botante nga di makatug nga maghayang nga maghunahuna nga siya nay hawod sa Malakanyang.
* * *
- Latest
