Caloy, angay kang maluoy

Gabii sa Agosto 13, 2024, Martes, giandamag Heroes’ Welcome Ceremony sa Malakanyang ang tanang atletang nakigkombati sa miaging 2024 Paris Ollympics.

Unya dihang gipadiskurso si Caloy sa iyang kasinatian giunsa pagdaog og double Olympic golds, imbes maoy pangitaog una ang iyang Papa ug Mama, ay, pastilan, sa kadaghan tawong iyang gipasalamatan, wala gyod maapil iyang Mama!

Nakalimot ba siya, nga kon wala pa ang sabakan sa iyang Mama, diin didto siya itisok sa iyang Papa, wala gyod untay Caloy, the Olympic golden boy karon? Nga sa ato pa, kon gikasuko niyang nanghilabot sa iyang kuwarta ang Mama, angay untang hunahunaon ni Caloy, nga bisag tipunon pa tanang bulawang medalya, ug milyonmilyon niyang premyo-insentibo, kulang ra kining ibayad sa giagiang mga pag-antos sa iyang inahan.

Ang Ginoo miingon: “Tahora ang amahan ug inahan. Patyon ang motunglo sa amahan ug inahan.” (Mateo 15:4) Pastilan, kakuyaw diay sa atong dangatan kon kita mamanamastamas ug magpakaulaw sa atong ginikanan?

Namatikdan. Parehong may pagkataas og garbo ang mag-inahan. Si Caloy nagpabiling bungol-buta sa naghilak nga panawagan sa iyang mga igsuon-ginikanan ug apohan nga mouli sa ilang balay aron saw-an pagbalk ang nawalang gugma sa ilang panimalay. Samtang ang inahan hugtanong namulong nga dili gyod siya maoy mouna ug duol sa anak.

Caloy, angay ka nang maluoy sa gitalikdan nimong mga minahal, kinsa naapektohan kaayo niining inyong panagbingkil diin ang pagtulon ra sa imong garbo maoy makasulbad.

Kon ikaw adunay Ginoo, buotang anak, dapat maoy mouna'g duol sa imong Mama ug personal mangayog pasaylo, bisan kon sa imong paminaw, ikaw walay sala. Sanglit mipahimangno baya Siya, nga kon adunay makasala kanato, kinahanglang istoryahon kini nga kamo rang duha ug nungkang ibandilyo sa social media.

Niining higayon nga gikaguol sa nagmahal mong inahan kining nahitabo kaninyo, Caloy, angay ka na nang maluoy dili lang kaniya. Kondili, sa tibuok ninyong pamilya. Puy-i ang tumang pagpaubos. Kay ang magpaubos, ipataas. Ug ang magpataas, ipaubos. Usab, ang dili kaantigo mopaambit sa mga grasyang gihatag sa Ginoo ngadto sa nanginahanglan, kuhaon kining tanan Niyag balik ug adto ihatag sa makamaong mo-share without condition.

Ayaw paabota nga kini moabot sa imong kinabuhi, Caloy. Intawon, ayaw!