P20M pagkaon sa SONA gisuka

Sa sinugdanan, tin-aw’ng gipahibalo ni House Secretary General (HSG) Reginald S. Velasco nga ang giandam budget alang sa pagkaon sa kumpirmado nang 2,000 kapin ka politikong motambong sa ikatulong State of the Nation Address (SONA) ni Presidente Bongbong Marcos Jr. (PBBM) nga adto ipahigayon sa Kongreso ning umaabot Hulyo 22, 2024, mokabat og P20M.

Hasta kapila pilopiloa ang kataposang 2021 SONA ni kanhi Presdente Rodrigo Roa Duterte (PRRD), diin migasto lamang og P200K. Dinhi mailhan, kinsa ang daginotan ug kinsa ang ekstrabagansa?

Ang mga bulingit, puwerte intawong pangukay og pagkaon sa basurahan aron matambalan ang naghilab nilang tiyan.

Ang mga ordinariyong mananagat kansang mga purol nangabuslot na lang sa pagpangisda, lipay na kaayo kon makatilaw-makaluto og usa ka kilong baboy kausa sa duha ka bulan. Samtang may mga poorest poor nga usahay ikatulog na lang ang ilang labihang kagutom.

Mga makaluluoyng senariyo kini nga dapat maoy unang gihunahuna ni PBBM, ayha pa mopasiugdag P20M nga mahalong pagkaon alang sa mga adunahan niyang bisita sa SONA, kinsa kanunay nang makatilaw niining mga lamiang potahe nga sukad-masukad, wala pa gyod matilalwi sa nahisgotang mga kabus.

Sa nangaging duha ka SONA, kapila ba balikbalikag pagpanghambog ni PBBM, nga sa iyang administrasiyon, bawal ang mga mangangalagad nga ‘magwawaldas sa pera ng bayan?’

Unya siya, iyang asawa ug iyang ig-agaw’ng House Speaker Martin Romualdez ra diay ang sigeg waldas? Pila na kaha ka bilyon ilang nagasto sa pagsigeg state visit sa nagkadaiyang kanasoran?

Ang pagpasiugdag mga eleganting party-party, salosalo ug concerts sa Malakanyang, dili ba very expensive man kini? 

Mianig walag tuong pagsaway sa social media ang administrasiyong Marcos ning ilang pagbandilyo sa P20M food budget alang sa SONA. Busa, gisuka kini sa mga nagpakabana, kinsa giluod pag-ayo ning ilang pag-abuso-usik-usik sa kuwarta sa katawhan.  Hinuon, daling mipagawas og pahabol nga pamahayag si HSG Velasco, kinsa mipasabot nga ang P20M dili lang diay kuno para sa pagkaon. Kondili, para na sa tanang galastohan sa SONA. Tinuod man, o dili ang iyang pagpasabot, daghan gihapon ang mibatikos niya. Sanglit, ang pagpunit og balik sa unsay gikaluwa-nalabay na, diin tunlon na usab, usa ka kinaiya nga iyaha sa hugawan.