Maayo ba ni?

Nakasuway ka na ba nga mikaon ka sa usa ka kan-anan, o kaha misulod ka og usa ka imnanan, unya ang imong bayranan gipatungan og service fee?

Nagsusi ko kon gidili ba kining gihimo sa ubang mga magpapatigayon. Way balaod nga nagdili niini, gawas lang tingali kon ang Local Government Unit (LGU) dunay ordinansa.

Mao nga maayo tingali nga awhagon nato ang mga konsehal dinhi sa Cebu City nga himoan nila og ordinansa nga idili na ang pagkolekta og service fee.

Sa usa ka imanan diha sa Ayala, nakita nako nga dunay gipatong nga 10 percent nga “service fee.” Mao pa’y mahal ang ilang beer, gipatungan pa.

Nangutana ko sa waiter, ug nasuta nako nga ang tanang service fee, bahinon nilang tanang empliyado. So pwede na nga dili ka mohatag og tip, ini'g human nimo’g bayad.

Pero ang 10 percent nga service charge, dako gyud kay anha man kini ibase sa imong bayronon. Kon ibutang nato nga P5,000 ang imong bayronon, aw P500 ang service charge.

Kon ibutang nato nga ma-regulate sa ordinansa nga dili na pakolektahon og service charge ang mga kan-anan ug imnanan, tan-aw nako wa gihapon ta’y daghanan.

Abi ninyo og ngano? Kadtong giimnan nako og beer, P110 ang gamay’ng botelya, unya kay patungan pa og P11, aw mahimo na nga P121 ang botelya.

Duha ra ka botelya ang akong giinom uy, grabe kamahal. Foreigner man gud ang tag-iya. Kon did-an na ang pagpatong og service charge, aw dili na sila mokolekta, pero ang presyo posible pa nga himoong P125.

Kon wa nay service charge, ang 10 percent nga magsilbing tip na unta sa waiter, mahipunta na hinuon sa tag-iya, ug kon maikogon ka, aw makahatag ka pa og tip sa waiter.

Busa unsa man gyud ang maayo niini? Ato ning patun-an sa mga konsehal, dili lang dinhi sa Cebu City, kon dili apil na sa mga silingan natong siyudad.

* * *

Kini bitaw nga pagpamaligya og mga plastic nga replica sa armas no, nga susama gyud sa tinuod kon tan-awon, angay ni nga idili na.

Mahimo man gud nga gamiton kini sa paghimo’g krimen. Sama didto sa kaulohan, duha ka minor de-edad, nanulis ug ang gigamit mao ang replica sa armas, ang usa hinoon kutsilyo gyud.

Kinsa man tawo’y dili mahadlok nga dili ka man makaila kon duwaan ra ba ni nga ang porma sama man gyud sa tinuod.

Mao kini ang mga armas nga ang bala, kanang gagmay nga platic pellets.

Pwede tingali nga itugot ni para sa mga sports activities, apan ang kolor, dili isundog sa mga tinuod nga armas.