Nanagana ni Quiboloy
Daghang salamat sa pag-apura ni Senador Risa Hontiveros, mora og kalit lang napugwat ang Philippine National Police (PNP) gikan sa ilang pagduka-duka sa pagpangita ug pagdakop ni Apollo Quiboloy. Nipasalig nang hepe sa PNP, si Director General Rommel Francisco Ambil, nga ilang gihimo ang tanan sa pagdakop ni Quiboloy.
Pero mas abunda ang mga ebidensiya sa ilang kalibog kun agresibo bang rondahon ang tanang posibleng tagoanan ni Quiboloy, o kutob ra sa paghangyo sa iyang mga abogado ug pagluwat og awhag pinaagi sa media nga mo-surender na siya, o pagpasalamat sa mga sakop sa Kingdom of Jesus Christ (KOJC) nga gipasud sila sa mga luna ni Quiboloy bisan way search warrant.
* * *
Hiku-hiko sa hepe sa PNP:
Nanghunaw nga igo lang nagsuporta sa National Bureau of Investigation nga maoy nangulo pagpatuman sa warrants (angayng pahinumdoman si Ambil nga ang warrants ikapatuman sa law enforcement agencies sa way pag-agad sa NBI); ug
Nipasalig si Ambil nga dunay taktika pagpangita ni Quiboloy nga gipatuman sa diplomatikanhong paagi (angayng pahinumdoman si Ambil nga hepe siya sa PNP di sa Department of Foreign Affairs).
* * *
Ubang mga opisyal sa PNP mapanagan-on sang Quiboloy:
Tigpamaba sa PNP nidupa nga di pa masuspenso ang mga lisensiya sa mga armas ni Quiboloy kay ang tanan niyang mga kaso wa maglambigit og armas; ug
Hepe sa PNP Davao nipalabi sa pag-greet ni Quiboloy kay dungan sila og birthday karong adlawa (Abril 25) ug nihinumdom nga ang nangagi nilang birthdays gisaulog sa pinuy-anan ni Quiboloy.
* * *
Maayo na lang nga dunay nakit-an si Hontiveros nga probisyon sa implementing rules and regulations sa Republic Act No. 10591, ang Comprehensive Firearms and Ammunition Regulation Act, nga usa sa mga sukaranan sa pagkanselar sa lisensiya mao nga ang tag-iya sa armas gipasakaan og kaso nga kapin sa duha ka tuig ang priso (life imprisonment ang sentensiya sa qualified human trafficking case, usa lang sa daghang kaso nga nag-ung-ong sa mga korte batok ni Quiboloy).
Maong nagkara-kara dayon ang Firearms and Explosive Office sa PNP pagrekomendar sa pagkanselar sa mga lisensiya sa mga armas ni Quiboloy. Hinaot nga kabahin sa diplomatikanhong mga taktika ni Ambil ang pag-aprobar dayon sa rekomendasyon.
* * *
- Latest
