Maayo pa magmotor

Duna ko’y sakyanan, apan akong gituyo nga nagmotor lang pag-adto nako sa lungsod sa Barili kaniadtong Sabado, bisan og naglagiting ang kainit sa adlaw.

Bugnaw gyud unta kon magsakay sa air-conditioned nga sakyanan, apan sigurado ko nga ma-high blood gyud tungod sa grabeng traffic gikan sa Minglanilla hangtud na sa Carcar.

Maayo ang motorsiklo kay makaliot-liot man sa daplin sa karsada bisan pa og grabe na ka traffic nga dili na hapit mosibog ang mga sakyanan.

Kinsa may dili mahadlok nga nakabasa man ko og post sa usa ka netizen nga gikan sila sa Cebu City, naabtan na lang sila og tulo ka oras, diha pa sila sa Lipata, Minglanilla.

Wa gyud ko masayop kay naghuot gyud tuod ang mga sakyanan sa karsada. Angay na gyud nga paspasan pagpalapad ang national highway gikan sa Cebu City hangtud sa Carcar.

Adto ka na makaginhawa’g lawom iniglapas na nimo sa rotunda sa Carcar kay mabuwag na man ang mga sakyanan nga mopaingon sa south.

Ang ubang sakyanan moderitso man paingon sa Sibonga, ug ang uban moliko usab paingon sa Barili ngadto na sa Dumanjug, Ronda lahos na sa Badian.

Naaninaw nako nga ang pagpalapad sa karsada nga gihimo sa Department of Public Works ang Highways (DPWH) diha sa Carcar ug San Fernando, kuwang pa.

Aw, hinuon, arang-arang na lang kon mahuman na lang ang road widening project sa DPWH, apan ang problema kay pwerteng hinaya sa pagtrabaho sa gi-hire nila nga contractor.

Naa pay mga tricycle nga makapalangay sa biyahe kay pwerteng hinaya man modagan, ug maghuwat ka pa og higayon nga maka-overtake niini.

Balikon nako, kining mga tricycle wa gyud unta kini tuguti pagbiyahe sa mga national highway, apan unsaon, nga ang atong mga opisyal pakyas pagpatuman sa maong balaod.

Dunay mga bahin sa karsada diha sa San Fernando ug Carcar nga nagpabiling gamay pa kaayo, ug daw sa way kausaban kon itandi nimo sa nanglabay’ng katuigan.

Suheto ko sa maong mga karsada kay sa bata pa ko, kanunay man ko nga dad-on sa akong inahan nga moduaw mi sa akong kaparyentehan sa Barili.

Unta ang kadagkoan sa DPWH mohimo unta kanunay og pagpasabot sa katawhan kon unsay ilang gihimo nga masulbad ang problema sa traffic diha sa Minglanilla paingon na sa Carcar.

Didto sa Tabuelan paingon sa San Remigio sa amihanang Sugbo, pwerte kalapad sa mga karsada, apan nagpadayon pa gani sila pagpalapad niini.

Ayaw ko’g ingna nga ang mga engineering district nga nagdumala sa Minglanilla paingon sa Carcar gilupig sa ilang mga kauban didto sa norte?