Ang kamahinungdanon sa usa ka sekreto

Ang pulong sekreto nagpasabot man og separation o discrimination (latin: secretum).

Apan sa laing bahin, ang usa ka sekreto mahimong kahimanan sa pagpamalandong. Ang maayong mga sekreto nga tinipigan mas makapaduol nato ngadto sa bisan unsa ngadto sa eternidad.

Ang mga dautang mga sekreto ug binuhatan makapalayo kanato sa naandang gutay sa kalambigitan. Bisan gani ang mga hayop, maglisud sa pagduol kanato gumikan tingali sa kaitom sa atong tanlag. Butang nga gikahadlokan ug mahimong mailhan bisan gani sa mga hayop. Sanglit ang tanan konektado man.

Matud pa ni Emily Dickinson: “The Soul selects her own society, then shuts the door to Divine Majority Present No More.” Usahay mahinungdanon kaayo nga duna kitay itago aron mas makaila kita sa atong kaugalingon. Mas makiangayon nga duna kitay itago aron mas makapaminaw kita sa Dios ug mas angayan nga kita motago aron makita nato ang Dios.

Sa ato pa, dili tanang mga higayon masayud ang kadaghanan kun kinsa kita ug kun unsa ang atong gihimo. Ang kahilom ug paghilom usa man ka dakong gahom.

Ang atong kinabuhi sama man sa usa ka hardin. Daghan kita og mga tanom ug aron atong mapanalipdan ang atong mga tanom, magbutang kita og koral.

Anaa kita sa ganghaan niini. Ug angayan lamang nga magmabinantayon kita kun kinsa ang atong pasudlon sa atong mga hardin.

Sama sa atong esprituhanong kinabuhi, ato kining panalipdan gikan sa bisan unsang paghasmag nga yawan-on. Hinumdomi nga bisan unsaon nato pagtago gikan sa Dios, dili gyud kita makalingkawas sa iyang mga mata.