Pagoryogoryo sa transition team

Dakong hagit alang sa katawhan sa probinsiya sa Sugbo ang problema sa giingong kalangay sa pag-arangkada sa transition team nga gimugna sa kagamhanan ni outgoing Governor Gwendolyn Garcia.

Daghan ang nabalaka niini tungod kay, kong padayong magpagoryogoryo ang kasamtangang nagdumala sa Kapitolyo, basin kuno kon makaapekto kini sa pagpatuman sa basic services ug ubang tulomanon sa sunod nga mamunoan sa lalawigan.

Bisan si Governor-elect Pamela Baricuatro mipadayag sa iyang kabalaka kabahin sa paglanganlangan sa transisyon team sa kampo ni  Gobernador Garcia. Sumala sa mga taho, si Garcia nagdumili sa pagpagawas sa kritikal nga mga dokumento ug nagdili sa miting tali sa mga pangulo sa departamento ug sa bag-ong administrasyon.

Kong tinuod kini, ang maong kakulian maghatag og dakong epekto sa serbisyo publiko. Ang kakulang sa koordinasyon mahimong hinungdan sa seryosong pagkalangan sa mga programa sa bag-ong administrasyon.

Ang katawhan sa probinsiya nagpaabot sa hapsay nga pagbalhin sa kapa sa kasamtangang kagamhanan ngadto sa sunod nga namunoan. Apan ang kasamtangang sitwasyon makapugong hinuon sa epektibong pagdumala sa sunod nga lider ning lalawigan sa Sugbo.

Ang katawhan sa Sugbo ang tinuod nga maapektohan niining maong kalangan. Ug ang kakulang sa kooperasyon sa kasamtangang administrasyon dakong babag sa epektibong pagserbisyo sa bag-ong kagamhanan.

Mao nga panawagan karon sa katawhan alang sa kasamtangang pamunoan sa Kapitolyo sa pagpakita og responsibilidad aron pagsiguro sa hapsay nga serbisyo ug dugang kalamboan sa lalawigan.

Apan ang pangutana karon: Maminaw ba ang kasamtangang administrasyon sa panawagan sa katawhan?