P4.7 milyong shabu nasakmit gikan sa vendor og tuslo-buwa

CEBU, Philippines — Nabalhog sa prisuhan ang usa ka giisip nga High Value Individual human nadakpan sa buy-bust operation sa Regional Police Drug Enforcement Unit (RPDEU) sa Police Regional Office-7 sa Sun Valley, Barangay Calamba, siyudad sa Sugbo pasado alas-9 sa gabii sa adlaw'ng Lunes, Marso 18.

Ang nadakpan mao si Jayson Rosales Formanes, 30, residente sa Sitio Mahayahay 2, Barangay Calamba ning siyudad. Si Rosales giingong vendor og tuslo-buwa sa lugar, nakuhaan og 700 gramos sa gituohang shabu nga nagkantidad og P4.7 million.

Base sa impormasyon sa RPDEU-7 usa ka buwan nila nga gi-monitor ang suspetsado ug nahibaw-an nga maka dispose kini og usa ma kilo nga shabu kada semana.

Duna matud pa kini contact sa usa ka jail facility nga maoy magsugo niya sa pag dispose sa mga illegal nga drugas.  Ang area of operations sa dinakpan kay naa sa Cebu City.

Pasakaan og kasong kalapasan sa Section 5 ug 12, Article II sa Republic Act 9165 ang suspetsado.

Sa laing bahin, 17 ka tawo ang nadakpan sa  kapolisan sa Presinto 1 sa Mandaue City Police Office (MCPO)  tungod sa ilegal nga drugas sa miaging gabii.

Sa maong gidaghanon, ang 15 niini nadakpan sa checkpoint ug ang laing upat nga naglakip sa duha ka mga babaye nasikop sa buy bust operation.

Si Police Major Andy Michael Roque, hepe sa Presinto  1 sa MCPO miingon nga ang sagad sa  ilang mga nadakpan gikan sa Siyudad sa Sugbo ug padulong na sa ilang pagpauli sa Lungsod sa Cordova,  Siyudad sa Lapu-Lapu ug Lungod sa Consolacion.

Nakuha gikan sa mga dinakpan ang mga pakete sa shabu nga ilang gialigar nga ilang gipalit gikan sa siyudad sa Sugbo. Romeo T.  Limpango/IBM BANAT NEWS