EDITORYAL - Nagpaugat ra

Gisaulog kagahapong adlawa ang Adlaw sa mga Mamumuo o Labor Day, Mayo Uno. Sama sa gipaabot, nimartsa ang nagkadaiyang mga militanteng pundok aron ipadayag ang ilang disgusto sa gobiyerno ug sa mga opisyales sa nasud.

Ang kalihukan didto sa Manila sa maong adlaw nagpakita sa kagawasnon sa mga Pilipino nga makapadayag.

Mao sab kini ang nahitabo sa ubang bahin sa nasud sama dinhi sa Sugbu diin nagmartsa usab ang mga militanteng pundok apil na niini ang mga drayber ug operators nga supak sa transport modernization sa gobiyerno.

Gani, atol sa maong adlaw gipaabot unta nilang dako ug makapatandog sa tanan ang ilang protesta kay nadungan man kini sa nagpadayong nationwide transport strike.

Apan makita nga dili na sila sama sa kaniadtong dekada 80 ka kusog. Ang mga drayber ug operators dili na parehas kaniadto kadako og epekto sa mga sumasakay kun silay molusad og tigil-pasada aron ipadayag ilang pagsupak sa mga polisiya sa gobiyerno.

Sa tulo ka adlaw nilang transport strike, mura ra og walay nahitabo. Wala ra maapektahi ang mga sumasakay tungod kay mayoriya sa ilang hugpong ang nisanong ug nakauyon man sa modernisasyon sa mga pasaheroan.

Niadtong Abril 30 ang extension sa deadline nga gihatag ngadto sa mga transport operators ug drivers nga magpasakop og kooperatiba o maghugpong aron magtukod og kooperatiba nga gitawag nga consolidation.

Kay pinaagi sa paghugpong, dali nalang para nila nga makahuwam og puhonan sa bangko aron makapalit og modernong jeepney nga maoy gimando sa public transport modernization program sa gobiyerno.

Kataw-anan lang kay dunay uban nga nagkuyog-kuyog anang transport strikes ug nipadayag og kasagmuyo bahin sa modernisasyon, apan sa kasingkasing diay, gusto silang mopadayon sa pagpamasahero kay lagi mao man kini ilang panginabuhian.

Gani ang LTFRB-7 miingon nga niadtong Abril 30 atol sa deadline, daghang mga operators ug drivers ang niapas og duso sa ilang mga dokumento nga nagpakita nilang naghugpong sila.

Nagpaugatay ra diay sila, kay kun nagpadayag pa ang gobiyerno nga posibleng lugwayan pa sila sa ilang hangyo, wala tingali bili ang deadline.