Sweldo pausbawan

Nindot ang tumong ni Presidente Bongbong Marcos nga gipatun-an niya ang posibilidad nga mahatagan og dugang sweldo ang mga trabahador sa pribadong sektor.

Atol sa Labor Day kaniadtong Miyerkules, ang mga Regional Tripartite Wage and Productivity Board (RTWPB) gimandoan sa presidente nga sutaon ang panginahanglan sa mga trabahador.

Dinhi sa Central Visayas, ang minimum wage nga gihatag sa RTWPB gamay ra gyud kaayo, kay ang P468 nga sweldo sa usa ka adlaw, kuwang kaayo sa inadlaw’ng panggasto.

Didto sa Senado, si Senador Juan Miguel Zubiri misuway pagsugyot nga usbawan og P100 ang inadlaw’ng sweldo sa mga trabahador, apan gisupak ni sa mga employer.

Nasabtan hinoon nako nga kun sobra ra kaayo kadako ang umento nga ihatag sa mga trabahador, hayan manirado na usab ang mga employer, ug mosamot ang problema kay daghan ang mawad-an og trabaho.

Busa, angay gyud nga timbang-timbangon pag-ayo sa mga sakop sa RTWPB kon pila ang angay’ng ipausbaw sa sweldo. Pero moingon ko nga angay gyud nga usbawan ang minimum wage.

* * *

Usa ka kanhi PDEA agent mimatuod gyud nga nakadawat sila og report niadtong 2012 nga si Presidente Bongbong Marcos, sa dili pa siya presidente, apil sa hulagway sa mga giingong nalambigit sa ilegal nga drugas.

Wa hinoon moingon si kanhi PDEA agent Jonathan Morales nga ang iyang informer nakakita nga migamit og ilegal nga drugas si Bongbong, pero matud niya giplanohan na sa PDEA kaniadto nga himoan og operation ang maong diha sa hulagway.

Matud ni Morales nga sa hulagway dunay artista, politiko, dunay mga babaye, ug matud ni Morales nga ang informer miingon nga adto sagad maghimo og ilegal nga kalihokan ang grupo sa usa ka condominium sa Makati.

Himoan na unta kuno nila og operation apan gipugngan sila ni kanhi PDEA deputy director general Carlos Gadapan ubos usab sa pagmando ni kanhi Executive Secretary Paquito Ochoa Jr. Daghan na nga mga ngalan ang nalambigit niining maong kontrobersiya, mao nga si Senador Ronald dela Rosa nga maoy chairman sa Senate Committee on Public Order, mimando nga imbitahon si Ochoa pagtambong sa sunod Senate Inquiry aron sukit-sukiton.

Ang kadagkoan sa PDEA karon miinsister gyud nga way dukomento sa ilang opisina nga magpakita nga si Bongbong, gi-report nga nalambigit sa ilegal nga drugas.

Gani, gikwestyon sa kadagkoan sa PDEA ang kredibilidad ni Morales kay kuno pag-apply niini pagka PDEA agent kaniadto, wa kini motug-an nga na-dismiss diay siya pagka polis. Buyno, paabuton nato kun unsay kalamboan niining pasangil nga si Presidente Bongbong nalambigit sa gidiling drugas. Nagsugod ra gyud ni kang kanhi Presidente Duterte nga may kasuko na kang Bongbong.