EDITORYAL - 77 porsiyento sa mga Pinoy andam

Andam matud pa ang 77 porsiyento sa mga Pilipino apil na niini mga kababayen-an nga makig-giyera para sa nasud batok sa mga langyaw nga kaaway sumala pa sa survey nga gihimo sa OCTA Research niadtong nakalabay nga buwan sa Disyembre.

Ang survey gihimo ngadto sa 1,200 ka mga gipangutana ug nasuta nga 77 porsiyento nilang tanan walo sa kada napulo nga gipangutana ang andam makig-giyera ug ibuhis ang kinabuhi para sa nasud.

Gani sa mga napangutanang nag-edad gikan 45 ngadto sa 54, ang 87 porsiyento nila o siyam sa kada napulo maoy pinakadaghan nga andam.

Nasuta sab sa maong survey nga 82 porsiyento sa mga gipangutanang mga lalaki ang andam ug 72 porsiyento sab mga babaye nga andam sab panalipdan ang nasud gikan sa mga langyaw.

Walay gipangalanang nasud nga posibleng mamahimong kaaway sa Pilipinas sa maong survey. Ang maong survey matud pa gi-komisyon sa  Armed Forces of the Philippines (AFP).

Nagpakita lang kini nga daghan gihapon sa mga Pilipino ang nagmahal gyud sa nasud ug andam silang mobuhis sa kinabuhi para niini.

Tingali, tungod kay wala na sab silay laing mabuhat kay naa dinhi ang ilang mga minahal sa kinabuhi nga kung maparot ang nasud sila gihapoy mag-antos.

Busa sayop gyud ang pagsige og duso anang mga gustong ibalik ang mandatory ROTC (Reserve Officers Training Corps) sa kolehiyo. Tungod kay kun pagpamahal sa nasud ang hisgutan, kanang tanan makat-onan diha palang sa balay ug sa pamilya sa mga kabataang Pilipino.

Kanang kwartang gastuhon para sa mga programa sa ROTC kun ibalik nga mandatory sa kolehiyo mas daghan pang pwedeng gamitan nga importante. Pwede kining adto ibubo sa kuwang kaayong pundo sa AFP.

Sa kasamtangang sitwasyon sa ROTC karon, sobra-sobra na ang mga reserbang sundalo nga makuha gikan sa mga eskuylahan kada tuig, apan hilaw sa military trainings, gun proficiency, combat training ug uban pa tungod kuwang ang kahimanan ug pundo.

Inay mogasto og dako para lang “daghang” reservists, unya kuwang og kamahoan, maayo pang dili nalang.

Mas maayong palambuon ug himuong seryuso ang kasamtangang programa sa ROTC aron tanang graduates niini dili hilaw ug pwede dayung ma-deploy panahon sa emerhensiya.