Dunay nahibu’ng

Daghan kaayong mga Sugboanon ang nakadawat og hinabang gikan sa nasudnong kagamhanan kaniadtong Biyernes pinaagi sa gitawag og Assistance to Individuals in Crisis Situation (AICS).

Base sa news report sa The Freeman, ang mga gipanghatagan naglakip sa mga nasunogan og panimalay, mga solo parents, mga pobre nga nanginabuhi lang pinaagi sa gitawag og “habal-habal.”

Ang maong kalihokan pagpanghatag og hinabang nga gihimo sa Department of Social Welfare and Development (DSWD) gitambongan sa igsuon ni Presidente Bongbong Marcos nga si Senador Imee Marcos.

Miadto pa gani si Imee sa Moalboal nga daghang AICS beneficiaries ang gihatagan og tag P3,000. Didto sa Moalboal, dunay natingala kay kuyog man ni Imee si Danao City Vice Mayor Ramon “Nito” Durano, unya wa didto ang mayor sa lungsod.

May nakapangutana ngano kuno nga miabot man didto sa Moalboal si Nito? Aw, suod baya ang pamilyang Durano ug Marcos gikan pa kang kanhi Kongresista Ramon “Nong Amon” Durano Sr. ug sa Papa ni Imee.

Pero, wa gyud kapugngi ang uban nga nagduda. Basin kuno si Nito dunay plano nga modagan og taas nga katungdanan sa probinsya kay bise gobernador baya ni sa Sugbo kaniadtong 1980 ngadto sa 1984.

Mao ba? Panid-an lang nato.

* * *

Grabe na gyud ang kainit karong panahona. Matud sa weather bureau nga usahay moabot sa 45 degrees celsius ang kainiton, nga kon magbuwad ka sa init sa adlaw, mapaso ka gyud, ug makuyapan.

Gani, kagahapon sa kadlawon sayo ko nga naligo kay duna koy gitambongan. Wa gyud ko batia og katugnaw kay pagpaagas nako sa shower, init-init ang tubig.

Nasabot nako nga epekto kadto sa kainit sa yuta nga ang tubig susama sa gigamitan og electric heater. Nalipay ko kay way tugnaw bisan og kadlawon pa ko nga naligo.

Ayaw kahibu’ng nga maka-shower pa ko bisan og nihit ang tubig karon sa MCWD ha? Abi ninyo, diri sa bukid dapit sa Busay, kusog kaayo ang bul-og sa tubig gikan sa Barangay Lusaran.

Dia diri mag-agi ang mga tubo sa tubig sa JE Hydro Bio-Energy Corporation, ang major supplier og tubig ngadto sa MCWD nga nagkuha og tubig gikan sa Barangay Lusaran.

Kon wa pa ang tubig gikan sa Barangay Lusaran nga 15,000 cubic meters (75,000 ka baril) kada adlaw, daghan unta sa mga nagpuyo sa north district nga magbagutbot.

Pero nasayran nako nga mohatud na og tubig ang mga water tanker sa MCWD ngadto sa lainlaing dapit sa Cebu City, Mandaue ug Talisay.

Nahubsan man gud ang Buhisan Dam ug Jaclupan Dam, mao nga limitado na lang ang tubig sa MCWD, kay ang mga water desalination projects wa pa mahuman.