Ang tinuod nga pagbag-o

Binasi sa: Jonas 3; 1-10

Ang nahitabo sa Ninibe usa man ka pagmatuod nga mahimo diay nga mausab ang laraw sa Dios. Gani, nahiubos si Jonas nga human siya maghago og pagwali nga laglagon na ang Ninibe ang nakapaaghat sa hari ug sa mga katawhan niini nga magpuasa, magbisti og sako.

Giapil pa gani nila ang mga hayopan nila. Nga sa ato pa, seryoso kaayo sila sa ilang paghinulsol ug sa ilang tinguha nga magbag-o. Busa, wala madayon ang maong kalaglagan. Naluoy ang Dios kanila.

Didto sa New York City , sa St. Patrick’s Cathedral nahitabo ang usa ka makalilisang pagpanamastamas sa balay sa Balay Alampoanan.

Usa ka LGBTQ activist nga ginganlan nila og Cecilia ang namatay. Wala mapahigayon ang Santos nga Misa sanglit ang maong katilingban  sa mga Transgender nihimo man sa ilang pasundayag agig pagpasidungog sa nitaliwan.

Ginamit ang mga bastos nga mga pulong mismo sulod sa Sagradong Dapit, pun-an pa ang mga pagsayaw sayaw ug ang awit nga Ave Maria ila mang giilisan og Ave Cecila. Daw sa walay igong nabuhat ang kadagkoan sa Simbahan sa liderato ni Cardinal Dolan. Matud pa, usa ka Reparation ang pagahimoon gumikan ning maong pagpanamastamas.

Lisud ang panahon karon. Sa ngalan sa sinodalidad ang simbahan maoy nipahiuyon sa kagustohang kalibutanon. Gibanlod ang doktrina sa lapok aron mahimuot ang kalibutan. Apan bisan pa man niini, pabiling tak-om ang tahas ingon nga propeta ning atong kapanahonan.

Nahimong bungol ang kadaghanan kanato sa hagit sa pagbag-o. Nagpabiling amang ang mga piniyalan sa pagtuo aron sila kanunay nga seguro sa mga mabugnaw nga lawak samtang naglibog ang ilang mga karnero. Pabiling buta ang tanan sa dayag nga pagpanglimbong sa mga pundok nga nangangkon nga may gahum sila sa pagpanagna ug paghimo og mga Milagro. Nahimong tagoanan sa mga tulisan ang mga hawanang Sagrado.

Adunay dakong krisis ang atong pagtuo. Dili paigo ang pagpangayo og pasaylo. Hinunoa, ang tinuod nga pagbasul anaa man sa nausab nga kinabuhi. Unta sugod sa mga anaa sa taas padulong sa ubos. Dili paigo ang kanunay nga pag-uyon hangtud nga mamahimong luoy ang mag yanong magtutuo.