Answered prayer sa Batang Hesus

Karong adlawa ang traslacion sa imahen ni Senyor Sto. Niño uban ang Birhen sa Guadalupe gikan sa Basilica Minore del Sto. Niño padung sa St. Joseph National Shrine diin mopundo hangtud sa gabii diin ipahigayon ang misa ayha dad-on sa dakbayan sa Lapu-Lapu sa simbahan sa Birhen sa Regla ug dayon dad-on sa Naval Forces Central NAVFORCEN diin manukad usab ang fluvial procession ugmang adlawa Enero 20, 2024.

Kini nga mga kalihokan ang giatangan usab sa mga deboto nga adunay mga tagsatagsa ka pangalyupo ngadto ni Senior Sto. Niño sama nalang niining tag-iya sa barko nga gihimong galleon nga kasakyan sa mga imahen sa Sagrada Familia. Siya si Dante Uy Matiao ang tag-iya sa Maayo Shipping Company nga nagbase sa Negros Oriental.

Matud ni Dante nga lima ka tuig niyang giampo nga makasakay sa galleon bisan man lang og anaa siya sa likod. Ang iyang gipangayo gihatag og sobra pa gani kay ang ilang barko na gyud na ang gipili nga sakyan sa imahen sa Balaang Bata. Matud sa negosyante nga 30 ka tuig na sila nga deboto sa Senior nga maoy naghatag kanila sa ilang gipangayo.

Usa sa milagro nga nasinati ni Dante niadtong panahon sa pandemic diin unang gikwestyon niya kon tinuod ba nga adunay Covid, ug wala magdugay gipasinati gyud siya sa balatian ug giluwas usab siya gikan sa peligro mugna sa virus.

Ang kasinatian sa negosyante nga hugot nga nagdebosyon sa Balaang Bata isa lang sa nagmatuod nga adunay milagro ug tubagon gyud kong unsay gipangayo ngadto sa Ginoo nga kinasing kasing ihatag gyud basta ubanan usab sa paningkamot.

Sa adlaw'ng Domingo na ang fiesta sa Senior Sto. Niño, unta ang paghimaya sa Balaang Bata ang sentro sa selebrasyon pakapin nalang ang paglipay lipay sa Sinulog Festival 2024. Viva Pit Senyor!