Wala kinahanglanang trahedya
Nagmahay ang konsehal sa usa sa mga lungsod sa isla sa Bantayan. Nakabatyag nga wala siyay kapuslanan nga pagka opisyal sa gobiyerno. Kay wala siyay nahimo pagtabang sa kanhi konsehal sa ilang lungsod. Namatay sa sakit nga nahikawan sa dinalian nga pag-atiman sa mga doktor.
Nadala ang pasyente nga may sakit sa kasingkasing sa Bantayan District Hospital. Tungod sa kakuwang sa mga espesyalista ug kahimanan, kinahanglang dad-on sa Vicente Sotto Memorial Medical Center (VSMMC) sa Cebu City. Pero gibalibaran. Kay dunay daghan pang mga pasyente nga nag-una niya sa listahan.
* * *
Nisuway pagtabang ang incumbent nga konsehal. Nanawag sa iyang mga kaila sa VSSMC. Gitug-anan nga ika-44 sa waiting list ang kanhi konsehal. Nanawag siya sa tanang kaila nga posibleng makatabang sa pasyente. Igo lang giingnan nga dili mahimong laktawan ang ubang mga pasyente.
Maong nakahukom silang dad-on ang kanhi konsehal sa pribadong ospital. Nabalaka ang pasyente nga wala siyay kuwarta nga ikabayad. Gipasaligan nga mag-amot-amot ang iyang mga higala aron maluwas siya. P75 mil ang ilang nahibaw-an nga deposito para masulod sa Intensive Care Unit (ICU) sa Cebu City.
* * *
Alas-7 sa gabii na niadtong Sabado nga natigom ang kuwarta. Itabok na unta siya paingon sa mainland. Pero uwahi nang tanan. Wala nang kaagwantaa ang pasyente.
Maong puwerteng sakita sa dughan sa incumbent nga konsehal. Napakyas pagpatambal dayon sa kanhi konsehal nga maoy nigiya niya sa politika. Igo na lang sa pag-alam-alam sa iyang kaugalingon nga gihimo niya ang tanan. Nangayo og pasaylo sa kanhi konsehal ug sa nagbangotan nga mga minahal sa kinabuhi.
* * *
Kon nahitabo kini sa kanhi konsehal sa lungsod, unsa kahay gidangatan sa ordinaryong mga molupyo? Kon nakabatyag og kainutil ang incumbent nga konsehal, unsa kahay gibati sa mga tagtungod sa ubang nangamatay nga pasyente nga walay koneksiyon nga nasangpit?
Makapa-alarma nang daan nga dunay mga pasyente nga maluwas pa unta pero nadisgrasya kay walay igong mga doktor ug kahimanan ang kinadul-an nga ospital ug nag-awas nang mga pasyente sa VSMMC. Mas makauuwaw nga eskandalo nga nahitabo kini sa kinadatoan nga probinsiya sa Pilipinas. Kansang kanhi liderato nipili sa paukyab ug kiatkiat kay sa pag-atiman sa panglawas sa labing nagkinahanglan nga mga Sugboanon.
* * *
- Latest
