EDITORYAL — Gibo gisuwaya’g guba?

Naay pagka-malisyoso kining nigawas nga balita kabahin ni Department of National Defense Secretary Gilbert “Gibo” Teodoro Jr.  nga nagbutyag nga siya dunay dual citizenship kay gawas nga siya usa  ka Filipino, usa sab siya ka Maltese passport holder.

Nakaingon ang mga tawo nga may bulok malisya ang maong balita tungod kay si Teodoro dili lang basta maoy kalihim sa DND, kondili maayo gyud niyang nabuhat ang iyang trabaho sa maong departamento.

Gikan sa inantigong pagsuporta ug pagpaluyo sa modernisasyon sa AFP,  wala siyay kahadlok kun mamahayag batok sa China may kalabotan na sa West Philippine Sea.

Gani, sa nakalabay nga Shangri La Dialogue didto sa Singapore, gipangsupalpal niya atubangan sa mga nagkadaiyang representante sa nagkalain-laing mga nasud ug mga organisasyon sa suway nga pag-sabotahe sa mga Chinese intelligence officers nga nagpakaaron-ingnong sakop sa media nga ang tumong ang pakauwawan ang Pilipinas atubangan sa mga delegado. Sila maoy nauwawan didto. Inutok ug inantigo ang mga pulong ug mga pamahayag ni Teodoro mahitungod sa isyu sa WPS, mao nga daghang mga nasud ang nakasabot sa sitwasyon sa Pilipinas nga gidaug-daog karon sa China nga padayung miinsister nga ilaha ang WPS bisan pa man sa 2016 Arbitral Ruling nga nag-imbalido sa ilang 9-dashline.

Malisyoso kaayo ang maong report tungod kay gi-timing gyud ang pagpagawas niini samtang init kaayo ang pagbarog sa Pilipinas batok sa China diha sa WPS.

Subay sa balaod, gidili sa usa ka sa gobiyerno sa Pilipinas ang dual-citizenship. Mao nga pwede kaayo kining gamiton sa mga Pilipinong pro-China aron dauton si Teodoro ug aron sab maguba ang paningkamot sa Pilipinas nga mobarog batok sa China.

Apan sa migawas nga artikulo sa Philippine Star, si Teodoro miangkon sa iyang pagka-dual citizen, apan tungod kini sa iyang pagka negosyante. Apan sa dihang nidagan siya pagka-senador niadtong 2021 (diin siya napildi), gi-renounce na niyang daan ang iyang Maltese citizenship.

Sa ato pa, palpak diay gihapon ang researcher nga gustong dauton si Teodoro, o, pamahala nalang ni para lang gyud samukon ang pokus sa kalihim nga makabaton ang Pilipinas og ‘minimum credible defense?’