Ang impiyerno

Dili pa lang dugay dunay gipamulong ang atong Santo Papa nga si Francisco kalabot sa impiyerno. Sa iyang personal nga panahom:

“Buot ko untang hunahunaon nga unta mamahimong haw-ang sa mga kalag ang impiyerno, gilauman ko kini nga tinuod!”

Nakaani kini og nagkadaiyang pamahayag ug reaksiyon kasagaran dunay mga kasagmuyo. Kay unsa ba gud ang impiyerno?

Sa atong katesismo gitudloan kita nga dunay tulo ka dapit nga adtoan ang mga kalag. Langit, purgatoryo ug impiyerno. Kini tungod kay anaa naman kitay paghukom alang gayud sa atong kahimtang.

Ang atong binuhatan mao man ang mohukom sa atong padulngan.

Ang langit alang sa mga matarong, ang purgatoryo alang niadtong gumikan sa ilang mga kasal-anan ang dili pa matugotan nga makasulod sa langit.

Pinaagi sa atong mga pag-ampo sila mahingpit diha sa kalayo sa purgatoryo aron mamahimo silang andam ug tagana nga makasulod na gyud sa langit.

Sa laing bahin ang impiyerno alang niadtong  nitalikod sa Dios.

Ang impiyerno dili lang mahitungod sa kalayo nga dili mapalong ug padayong mosakit sa demonyo ug sa iyang mga hinanib o mga kalag nga nasilotan kondili sa paghikaw kanila sa kahigayonan nga makasud-ong sa mahimayaong dagway sa Dios. Wala nay chance kun anaa ka na sa impiyerno.

Kun anaa ang sala dili mahimong hawan ang impiyerno. Ang kalipay sa yawa mao nga ang mga tawo dili motamod sa iyang presensiya aron makapadayon siya sa paglihok nga dili hisayran ug kini ang nahitabo karon.  Moabot ang panahon nga mahimong isangyaw ang pinakadakong bakak nga mao kini: “WALAY SALA UG WALAY YAWA!”