Panag-ilog sa Sinulog
Way moangkon sa mga hingtungdan, pero ang Sinulog Grand Parade nahimo nang kontes sa mga politiko. Nga nagpatas-anay sa ilang garbo. Pulos sila nangangkon nga nag-debosyon ni Sr. Sto. Niño. Pero ilang aksiyon nagmatuod nga gipalabi ang ilang politikanhong kahawod. Ug gipaka-bathala ang ilang politikanhong ambisyon.
Ang makaluluoy sa ilang bugno mao ang mga Sugboanon. Maglibog na sa kahulogan ug kapuslanan sa nagkalainlain nga kalihokan. Kayagaw sa mga lagda motanggong sa mga dunay dinalian ug importanteng mga biyahe ug mohasol sa mga negosyo ug mga panginabuhi sa mga labing gagmay.
* * *
Nganong gipamugos na sab ni Cebu City Mayor Mike Rama ang South Road Properties (SRP) isip venue sa Sinulog 2024, bisan kinamingawan ang Sinulog 2023?
Kay naglaom siyang mas daghan nang makatultol karong tuiga; o
• Kay nagpabilib sa mga negosyante nga nisugal sa SRP, sama sa SM, Filinvest ug Robinsons; o
• Ganahang momatuod sa kalig-on sa liderato sa Sinulog (bahala na nga inutil sa baha ug trapiko); o
• Nahinayak na maong magpaugat na lang (kon langawon gihapong parada karong Enero 21, duna na tay unsay iyang dangatan sa 2025).
* * *
Bisan sa patuo nga nabalaka lang sa kaluwas sa ilang dancing contingents, ang mga politiko sa Sugbo nakakita og kahigayonan sa:
• Pag-ilog sa kabantogan sa Sinulog nga wa matandog bisan giribalan sa ilang festivals;
• Kon uwanon ug may malimbuwad na sab karong Enero 14 (sama sa nahitabo sa Carmen sa niaging tuig), maklaro na gyod asa kapusta si Sr. Sto. Niño; ug
• Pagmatuod sa mga mayor nga ang bugtong nilang mahimo mao ang pagyango sa Kapitolyo.
* * *
Salamat sa kataphaw sa administrasyon ug ka-feeling hawod ni Rama ug kahakog sa atensiyon sa iyang mga kaatbang, mao na ni ang sinugdanan sa kataposan sa pagnegosyo sa Sinulog:
• Managana nang mga kompaniya sa paggasto og minilyon ka pesos pagbayad sa makalilisang nga advertising rates sa Sinulog Foundation kon usa ra ka barangay ang manan-aw; ug
• Human pasagdi sa mga botante ang mga politiko sa paglipatlipat sa mga transaksyon sa tibuok nilang termino–sugod sa nangaging vote buying hangtod sa sunod–hinaot nga di na sila mapasaylo sa katawhan, ug labi nang Sr. Sto. Niño, kon hasta ang Sinulog ilang binastosan.
* * *
- Latest
