Nikalit man og daghan ang mga kabus nga mopahimulos sa P20 nga kilos sa bugas

Temporaryong gipahunong ni Cebu Governor Gwen Garcia ang pagpamaligya sa tag P20 matag kilo sa bugas humay ubos sa programa sa Sugbo Merkado Barato nga gilusad niadtong Lunes tungod kay nanghinumbra naman hinoon ang mga kabus nga gustong makapahimulos sa programa.

Tiaw mo kana nga ang listahan sa Department of Social Welfare and Development kon DSWD aduna lay 199 thousand nga poorest of poor apan ang gisumiter sa mga local Social Welfare Office niabot naman sa 303 thousand pastilan asa man ka manangkong ana? Tilapan ra gyud ang bugas ana nga gipalit sa kapitolyo sa National Food Authority kon NFA.

Nganong nahitabo man kini? Sa Sinugdanan pa lang tataw kaayo ang lagda gikan mismo sa gubernador nga kadtong mga kinapobrehan lang ang makapalit sa barato nga bugas ug kadtong mga local social welfare office ang mosuta kon tinuod ba sila nga mga kabus aron maapil sa programa.

Tinuod man seguro nga pobre sila apan dili pud nga walang wala na gyud seguro ang uban kabus man pero aduna pay makuot nga ikapalit og commercial rice. Kong ang gubernador pa ang pagbot-on hatagan ang tanan pero limitado man gyud ang supply gikan sa NFA tungod usab sa rice tarrffication law.

Andam ang provincial government mogahin og tag 100 million pesos nga ipalit sa NFA rice apan unsaon man nga wala may mapalit, kutob ra gyud sa dakong tinguha nga makatabang sa mga kabus ang kagamhanang probinsyal pero dili man mahimo kay kuwang ang tinubdan.

Bisan pa man sa limitasyon napakita sa lalawigan sa Sugbo nga mahimo gyud nga matuman ang saad sa presidente nga makapahimulos ang mga kabus sa tag P20 nga presyo sa bugas matag kilo. Nakaani kini og pagdaye mismo ni House Speaker Martin Romauldes ug posibleng sundogon sa uban. Apan ang problema mao ang tinubdan sa bugas kon asa mokuha.

Mo-resume ang programa sa kapitolyo sunod semana kong malimpyohan nang listahan hangtud aduna pay supply matud pa sa gubernador. Kadtong mga kabus nga makapalit pa og commercial rice ayaw lang sa mo og avail ani ihatag nalang sa kadtong walang wala na ka gyud.