Babayeng wala sa maayong pangisip napahimungtan patay

Wala na maabti intawon sa iyang ika 39 nga kasumaran sa adlawng natawhan ang usa ka babaye'ng nawad-an og maayong pangisip human gipanghimungtan sa usa ka tawong naghurimentado sa sitio Tarcom Upper Laguerta baranggay Lahug dakbayan sa Sugbo. Igo lang intawon nagpundo ang babaye sa covered court dihang naabot ang suspek ug dayon pusil ka duha ka higayon sa babaye nga maoy nakaingon sa iyang kamatayon.

Nadakpan ang suspek atol sa gipahigayon nga follow-up operation sa kapolisan og nabalhog na karon sa bilanggoan sa Mabolo Police Station kinsa nakuhaan usab og armas ug mga bala.

Ang panghitabo bunga sa tumang kalagot sa suspek kansang anak ang unang napusilan patay sa laing tawo didto sa sitio Nivel, Barangay Busay sa Cebu City ug gumikan kay napanglimutan na siya nisulong kini sa dapit diin nagpuyo ang suspek ug grupo niini didto nagpataka nalang siya sa pagpamusil.

Nadakpan naman unta ang suspek sa pagpatay sa iyang anak. Gani nagtingkagol na usab kini sa prisohan. Apan dili niya madawat ang nahitabo nga nisangpot sa brutal nga lakang nga iyang gihimo ug giamong pa niya ang babaye nga inosente

Dinhi makita nato nga dili gyud magbunga og maayo ang sobra nga emotion. Inay mosanga pa kini og mas grabe pa nga problema sama sa gihimo sa amahan nga nasakitan sa kamatayon sa iyang anak, apan sayop ang iyang gihimo labi na nga naamong ang walay labot.

Dakong kasakit ang gibati sa babayeng namatay apan mas dako nga misirable ang nahiaguman sa lalaking suspek kay namatyan siya og anak, nakapatay pa siya og inosenteng biktima nga bawnon niya ang hasol sa iyang tanlag hangtud sa hangtud. Maayo unta to kong ang iyang nakutloan sa kinabuhi ang suspek sa kamatayon sa iyang anak apan dili man kini ang nahitabo. 

Sunodsunod na ang nahitabong pagpamusil sa Metro Cebu diin ang usa sa natukmod sa ingon niini nga panghitabo ang kainit sa ulo. Posibleng gun-for-hire ug ang daghan nga mga loose firearms nga maoy target usab karon sa kapolisan nga masakmit aron dili na magamit pa sa paghimo sa krimen.

Ning uwahing shooting incidents nadakpan ang mga suspek ug mapasakaan og tukmang kaso. Unta ingon usab niini kadali ang pagsikop sa mga suspek sa ubang nahitabong krimen sama sa duha ka mga kriminal nga nipatay sa multiawarded policeman Ryan Baculi.

Usa sa epektibong pamaagi ang pagpakiglambigit sa komunidad nga maoy motudlo sa nahimutangan sa mga kriminal.