Patriotic vloggers ipa-Percy Lapid?

Tam-is handumon kadtong ilang Uniteam ni Presidente Bongbong Marcos (PBBM) ug Bise Presidente Sara ‘Inday’ Duterte-Carpio sa miaging 2022 election. Diin, kinabag-ang vloggers, kinsa gustong mapadayon ang nasugdan nang ‘change has come’ ni kanhi Pangulo Rodrigo Roa Duterte nagkahiusa pag-ukab sa mga baho sa kontra ug labihang pangapkap og mga lehitimong ebidensiya nga modepensa sa mga hugawng tirada batok sa BBM-SARA tandem.

Pagpuo sa korapsiyon. Pagtapos sa nagakahuyang nang walhong grupo ug paghiusa sa tanang politiko ug katawhan para ‘sabay-sabay tayong makabangon muli’ mao ang saad ni BBM. Ug gumikan niini, daghang vloggers migasto sa kaugalingon nilang kuwarta, mitabang sa pagpangampanya diha sa pagbadhas sa kadalanan, nag-survey ug mipakita sa video footage nga ang BBM-SARA Uniteam maoy kinakusogan. Unya, gi-post dayon sa social media. Aw, midaog si BBM ug Inday. Landslide pa!

Apan sa 100 ka adlaw pa lang nga paglingkod ni PBBM sa Malakanyang, nagpakita na siyag pagluib. Pakyas siya pagpili og mga tarong-ligdong nga cabinet members. Ultimo si Vic Rodriguez, kinsa maoy spokesperson niya sa wala pa ang campaign period hangtod siya midaog, gipatilaw ra intawon niyag kadiyot og pagka-executive secretary. Unya, giitsa-puwera dayon.

Ang Department of Agriculture, inay batid-ligdong agrikulturista maoy iyang ibutang, siya hinuon ang nangunay paglublob, diin misulbong ang dakong kontrobersiya sa smuggling, hoarding sa sibuyas bombay, bugas, asukar ug uban pa. Nga natimahoan! Mga suod ra sa iyang kinabuhi maoy author.

Busa, dili mabasol kon adunay vloggers moangal ning dili makiangayong pagdala ni PBBM sa atong nasod ilabi na sa kapakyas pagtuman sa iyang matam-is saad. Pipila kanila nakadawat nag listahan sa mga ngalan sa vloggers nga ipa-Percy Lapid kuno aron mahilom nag sigeg tagawtaw bahin sa confidential fund-extraordinary expenses-classified funds controversy, kansang kuwestiyonabling pamaagi nagtug-an, nga ang korapsiyon sa Pilipinas anaa diay sa Kongreso ug Senado.

Pipila kanila hagbay rang gitanyagan og dakong kantidad aron mohunong na sa pagbutyag sa mga kahiwian sa atong kagamhanan, apan hugot nilang gibalibaran. Kay alang nila, mas malipay ang Ginoo kon mamatay ka tungod sa imong pagpakig-away sa mga daotan aron maluwas ang katawhan ug atong nasud. Nungkang, makig-abin sa mga sungayan nga impiyerno ray mapuntariyahan.

Ngiga prinsipyoha, sa Kapanaminan!