EDITORYAL - Nasaan ang smugglers at hoarders ng sibuyas?
Noong nakaraang Disyembre 2022, naging ginto ang presyo ng sibuyas na umabot sa mahigit P700 bawat kilo. Unang pagkakataon na naranasan sa bansa. Ayon sa mga magsasakang nagtatanim ng sibuyas, hindi naman dapat lumobo ng ganun ang presyo sapagkat wala namang kakapusan sa sibuyas sa bansa. Ayon pa sa mga magsasaka sagana sa sibuyas at ang kailangan lamang ay mga bodega na pag-iimbakan para hindi mabulok.
Hinala ng mga lokal na magtatanim ng sibuyas, dahil sa smugglers ng sibuyas kaya tumaas ang presyo nito. Dumadagsa ang puslit na sibuyas mula sa China at saka iho-hoard. Kapag wala nang sibuyas sa mercado saka ilalabas ng mga tusong negosyante ang nakaimbak. Mataas na ang presyo. Walang magawa ang mamamayan kundi bumili ng gintong sibuyas.
Wala namang lakas para mapigilan ang smugglers ng sibuyas at iba pang agri products. Patuloy ang pagdagsa ng mga smuggled na bigas, sibuyas, carrots at maski karne na kadalasang galing sa China. Nakapagtataka naman kung paano nakalulusot sa Bureau of Customs (BOC) ang smuggled agri products.
Nagkaroon na ng pagdinig sa Senado ukol sa talamak na smuggling ng agri products at may mga pinangalanan na. Kabilang sa mga nabanggit ng Senado ay sina Manuel Tan na nag-o-operate sa Subic, Cagayan de Oro, at Batangas; Andrew Chang na nag-ooperate sa Subic, Port of Manila, Batangas at Manila International Container Port; Jun Diamante na nag-i-smuggled ng isda at si Luz or Leah Cruz na tinaguriang “Sibuyas Queen”.
Nasaan na ang personalidad na tinukoy? Wala nang balita sa kanila. Noong Hulyo, sinabi ni President Ferdinand Marcos Jr. hahabulin ang smugglers at hoarders. Hindi umano makakalusot ang mga nagpapahirap sa bayan at mamamayan. Hanggang ngayon, wala pang nakakasuhan.
Noong nakaraang linggo, ipinag-utos ng Office of Ombudsman si Department of Agriculture (DA) Asec. Kristine Evangelista na sampahan ng kaso dahil sa maanomalyang pagbili ng mga sibuyas. Ipinag-utos din ng Ombudsman ang pagsasampa ng graft at falsification of documents kay Food Terminal Inc. (FTI) Vice President John Gabriel Trinidad, at 16 na iba pa. Sabi naman ni Evangelista walang katotohanan ang inaakusa sa kanya. Kahit kailan daw ay hindi siya nakasuhan ng pagnanakaw.
Ang hangad ng taumbayan ngayon ay makasuhan naman ang mga smugglers at hoarders. Mas lalong matutuwa kapag ang mga ito ang naitapon sa kulungan. Sila ang mga salot na nagpapahirap sa mamamayan at sa bansa.
- Latest
