Pagkamanggiloy-on ang vote buying

Nagtambayayong ang COMELEC ug ang Public Attorney’s Office (PAO) aron batokan ang vote buying ug vote selling. Sa gilagdaan nga Memorandum of Agreement tali sa duroha ka ahensya, motabang ang PAO sa COMELEC paglutos ug pagtaral sa hukmnanan niadtong mga poll offenders.  Bisan unsang gimik na lang ang nahunahunaan sa COMELEC apan sayod ang tanan nga malisod sumpoon ang vote buying.  Kay ginaingon man gani nga “Pagkamanggiloy-on baya ang paggamit sa pundo sa kagamhanan aron pagpalit og boto.” Busa, ‘good luck’ na lang ning ilang panagkumboya.  Fezteleern!

Magtudlo’g komedya

Suportado sa Philippine Chamber of Agriculture and Food Inc. (PCAFI), usa ka pundok sa mag-uuma, ang gihugon-hugon nga pagtudlo sa fishing tycoon nga si Francisco Tiu Laurel, Jr., isip bag-ong kalihim sa Department of Agriculture.  Apan supak usab ang pundok sa mga mananagat nga PAMALAKAYA nga itudlo si Laurel. Ang pagtudlo’g kalihim usa sa gahum nga gihuptan sa Presidente ug siya lang ang mabasol kon ang matudlo mao kadto’ng kusog lang mangatik ug magpaka-aron-ingnon.  Alang sa akong amigo, mas ganahan siya kon ang Presidente mag-estorya lang og komedya (joke) inay magtudlo kanila (joker) sa pagka-kalihim.  Muleeng!

Aron di na tudloan

Misaad si Presidente Marcos nga atimanon niya ang mga panginahanglan sa sektor sa edukasyon sa dili pa matapos ang National Teachers’ Month, nga nagsugod niadtong Septiyembre 5 ug matapos karong Oktubre 5.  Panawagan sa mga magtutudlo nga, gawas sa mga pagdayeg kanila, kinahanglan usab nga mousbaw ang kahimtang sa ilang pamuyo ug sa ilang pagpanarbaho. Hinaut nga matuman ang saad sa presidente. Ang pagka-magtutudlo maoy bugtong propesyon nga naghimo sa tanan nga propesyonal.  Labaw sa tanan, ang mga maestra maoy nagtudlo sa mga bata aron dili na kinahanglan tudloan ang mga hamtong.  Maylain pa!

Iwara-wara ang ikog

Nagduda si Cebu City Veterinarian Dr. Jessica Maribojoc sa katinuod sa taho nga gipatay sa iro ang iyang kaugalingon nga agalon.  Alang sa beterinaryo, ang relasyon ug pagsalig nga nagbugkos sa iro ug sa iyang tag-iya hugot kaayo ug dili kini mahimong mahanaw lang dayon.  Adunay basehan ang pagduda sa City Veterinarian.  Mas kadudahan ang tawo nga dili ganahan og iro apan mas kasaligan ang pagbati sa iro kon ipakita niya nga wala siya makauyon sa tawo.  Gani, ang rason ngano nga dagha’g higala ang iro mao nga, sukwahi sa tawo, mas palabihon sa iro ang pagwara-wara sa iyang ikog, kay sa iyang dila.  Madahaan!

Angayan Likayan

Human sa kamatayon sa duha ka batan-on sa kamot sa kapolisan, mihukom ang PNP nga manghatag ug mogamit na usab kini og mga sirbato ug batuta sa pagpatuman sa balaod ug nga nga ang paggamit sa armas katapusan nga option lamang kon magdakop sa mga suspetsadong kriminal.  Mas maayo tingali nga pilion ug kadto lang mga kwestiyonable ang pamensar ug abilidad ang hatagan sa sirbato ug batuta.   Sa ingon, mahibaw-an dayon sa publiko ang pulis nga kulang sa mental ug psycohological nga kapasidad ug angayan nga likayan sa katawhan.  Pagkatoytoy!