Panaw sa adbiyento: Pagduaw Sukaranang Teksto: Lk. 1;39-45

Dinhi sa among parokya sa Madridejos, Alegria may inadlaw akong tulomanon nga mao ang pagduaw sa kabalayan panahon sa Barangay sa Birhen. Ang among buhaton mao nga mag-ampo sa Santos nga Rosaryo, mamalandong sa ebanghelyo sa sunod Dominggo, magsab-ong sa eskapularyo ug magdasig kanila aron mosimba sunod Dominggo.

Kahigayonan ko usab kini isip ilang padre kura nga mangumosta ingon mag-survey kun kinsa kadtong wala pay kasal, bunyag aron sa ingon kahatagan ang maong panginahanglan og igong pagtagad segun sa atong kapasidad ingon man sa mga available resources nga mahimong itabang sa parokya.

Ning maong pamaagi atong makita ang mga mosunod nga mga punto:

1. Presence. Mahinungdanon kaayo kini bisan pa man kun wala kitay pagahimoon. Atong naandan man gud mao nga mangita dayon kita sa solusyon sa bisan unsang suliran. Tungod sa maong dinali daling tinguha makahatag kita og solusyon sa dili mao nga suliran. Dili ba? Ang presensiya dako na kaayo og kahimoan.

2. Communion. Ang pagduaw ingon man ang pagsalmot sa bisan unsang kalihukan pagpadayag man sa atong pag-unong. Sa kalipay man o sa kasakitan. Ang Sagrada Eyukaristiya mao man ang nakapahiusa kanato sa Ginoo nga nibuot nga makighiusa kanato bisan pa man sa atong tawhanong kaalaut.

3. Service kun pangalagad. Makaalagad kita kun hisayran nato ang lintungdanay ug ang tinubdan sa mga panghitabo sa atong palibot. Matang sa pangalagad nga wala na magkinahanglan pa og balus sanglit ang pagpaabot sa ingon dili naman pangalagad kun dili panginabuhi naman lamang. Nagpaabot kita og suhol gumikan sa atong paningkamot. Apan diha sa mata sa usa ka Kristohanon kita mangalagad sa mga kaigsuonan nato sanglit nahigugma man kita sa Ginoo ug sila nga atong mga kaigsuonan ang dagway ug bayhon sa atong Ginoo nga taliabot sa hustong panahon. Amen.