Komprehensibo'ng  solusyon

Giawhag sa Cebu City Council ang buhatan sa CCDRRMO, DEPW, OBO ug CCENRO sa  pagsumiter sa ilang tagsa-tagsa ka evaluation report sa mga lugar nga apektado sa pagbaha, ingon man ang mga drainage systems nga gihimo aron mamenosan ang epekto sa pagbaha.  Komplikado na kaayo kini’ng problema sa baha ug dili na kini mahimong ikapasumangil sa usa lang ka hinungdan.  Komprehensibo ug makuting pagtuon ang gikinahanglan aron makab-ot ang tukmang solusyon.  Ang kahimtang karon sa siyudad sa Sugbo nahisama na sa pinuy-anan sa hulmigas nga “bisan ang diyotay’ng hamog hinungdan na sa pagbaha.” Fezteleern!

Kabahin sa kinaiyahan

Nakadawat og laing reinforecement ang kagamhanan sa dakbayan sa Sugbo sa programa niini nga Gubat sa Baha human mipasalig ang Visayas Command nga mo-deploy og mga Army personnel ingon mga heavy equipment aron motabang sa paglimpyo sa mga kasapaan sa syudad.    Lain’g matang sa kaaway ang sagubangon sa kasundalohan kay kinaiyahan na man ang ilang atubangon busa dili angayan mokumpiyansa.  Angayan hinumduman nga “Ang tawo kabahin sa kinaiyahan ug ang pagpakiggubat sa tawo sa kinaiyahan, pagpakigubat usab sa iyang kaugalingon”.  Tinuod gayod!

Propaganda lang ba?

Segun sa balita gikan sa China State News agency nga Xinhua, duha ka mananagat nga Pilipino nga giluwas sa Chinese People’s Liberation Army (PLA) sa kadagatan sa Spratly Islands.  Giingon nga samaran ang usa sa mga mananagat.  Wala pa makompirma ang katinuod sa maong balita  ug dili nato masalikway ang posibilidad nga propaganda lamang kini sa China.  Makapahinumdum sa bata nga nagsud-ong sa laing bata nga nagkaon og ice drop.  Gipangutana sa naulahi kon ganahan ba ang nagtan-aw nga bata mokaon sa iyang ice drop.  Sa dihang mitando ang gipangutana nga bata, giingnan na man hinuon nga, “Palit og imo.” Pagkatoytoy!

Imo-imo na laman na!

Gipanghimakak sa China ang pasangil nga ilang gihawanan ang Rozul Reef sa mga tanggapa ug kagasangan niini ug ang maong pasangil usa lang ka “political drama gikan sa handurawan.” Midugang ang China nga ang BRP Sierra Madre nga nasangad sa Ayungin Shoal maoy nakahimo’g kadaut sa kalikupan sa maong lugar. Nadiskobrehan ang kadaut human mobiya ang mga barko sa China gikan sa maong lugar.  Tugob sa ka-matrido ang pamahayag sa China.  Naunhan na usab kita sa opensiba sa pulong busa sagupon na lang nato ang tinubagan sa mga bata nga ng-ingon, “Imo-imo na laman na China.”  Madahaan!

Usbawan ang kalidad

Nabalaka ang mga utility companies nga kon ipatuman sa kagamhanan sa Mandaue City ang single pole policy ordinance alang sa mga wiring ug cable installations, moresulta unya kini’g mga aksidente ug mga kadaut tungod unya sa “overloading.”  Daw haguka ang rason nga “overloading” kay masulbad man kini sa teknolohiya.  Hinonoa, dugang galastohan ang nakita nga tinuod nga rason.  Angayan tamdan sa mga TELCOs ang panultihon nga, “Sulagma lang nga mousbaw ang kalidad sa serbisyo pinaagi sa pagkunhod sa gasto, apan sa kanunay makunhoran mo ang gasto kon usbawan mo ang kalidad sa serbisyo.” Muleeng!