Imee tiunay ba kang Inday?
Sa usa ka ambush interview, dihang gipangutana si Senador Imee Marcos sa taga media kon unsay iyang ikasulti sa pagresayin ni Vice President Sara ‘Inday’ Z. Duterte gikan sa gabinite ni Presidente Bongbong Marcos Jr., isip Department of Education (DepEd) secretary ug co-chairman National Task Force to End Local Communist Armed Conflict (NTF-ELCAC), ania iyang tubag:
“Na ano man ang mangyari, ang aking paniniwala at pagmamahal para kay VP Sara ay manatili ano mang laban, ano mang hakbang, ano mang hinanaharap, akoy kasama niya.”
Pastilan, pagkalalim paminawon, pagkalami saw-an niini sa pamahaw, paniudto ug panihapon niining panahon nga giantos sa katawhan ang grabing kagutom ug ang labihang pagtaas sa presyo sa mga palaliton tungod sa walay pakialam ug pagka-very incompetent nga pagpamunoan sa iyang igsuong walay kaugalingong pulidong desisyon, ilabi na sa mga delikadong situwasiyon.
Diin gumikan sa binugo niining paghukom, posibleng makapaulbo sa dakong gubat; ‘pobreng Pilipinas batok higante-adunahang Tsina.’ Nga seguradong makahatod lamang ngadto sa makapakitbing kamatayon natong tanang Pinoy, kinsa wala intawoy sarang ikasukol.
Seryoso kaha si Senador Imee diha sa iyang pag-ingon, nga ulan man ug init, sa bisan unsang suliran-gumonhap nga sagubangon diha sa pagpangalagad ni VP Inday, anaa ra siya pirme sa likod niini ug andam kanunay sa pagpakig-abin-tabang ni Inday? Tiunay kaha kining gipamulong ni Senador Imee, kang kansang dugong naglatay sa iyang kaugatan mao ra usab ang anaa sa kang Bongbong Marcos?
Kahinumdoman. Mga kanhi BBM-SARA Uniteam diehard supporters miapil bayag pangumbinse sa mga anti-Marcos, nga tanang salawayong nabuhat sa amahan, dili binuhatan sa anak. Tuod, milyonmilyon ang nakombinse. Ug unsay nahitabo dihang midaog pagka-presidente ang Junior? Gipalabwan pa ang mga daotang nabuhat sa Senior. Kanus-a ba mahitabo nga ang dugong Marcos mahimong dugong Duterte? Mao nga VP Inday, ingat!
Kay kon tiunoray pang higala si Imee, dihang gitabangan si Inday pagkulata ug hapit na lang kuniskunisa sa mga tigreng Kongresista ug Senadores pinaagi sa pang-impeach nilang mga pasangil, giduphan-gidepensahan-gilabanan ba ni Imee ang limpyo-ligdong nga Inday?
Kini, igo nang makahatag og ideya kon si Imee tiunay bang para kang Inday? Unta ang nabudol-ilad sa mga Marcos sa miaging 2022 election, dili na magpailad!
- Latest
