Dios sa kahimsog

Hunyo 30, 2024: Ikanapulog-tulo nga Domingo sulod sa tuig

Mga Pagbasa: Kin. 1;13-15;2;23-24/Sal. 30/2 Cor. 8;7,913-15/Mk.5;21-43

Maayong Balita

Sa atong ebanghelyo karong Dominggoha nahitabo ang nagkadaiyang kasinatian sa milagro sa kaayohan. Ang babaye nga gitalinug-an sulod sa hataas nga panahon ang naayo man gikan sa iyang balatian sa dihang nakahukom siya sa paghikap sa sidsid sa bisti ni Jesus.

Tuod man nahitabo gyud kini gumikan sa iyang pagtuo. Nakabantay ang atong Ginoo niini ug sa dihang nitug-an ang maong babaye gihatagan siya sa Ginoo ug pasalig nga dili angayan nga mabalaka.

Sa laing bahin, atong nakita ang anak ni Jairo nga human mamatay nabuhi timaan nga ang Dios, Dios sa kinabuhi ug dili sa kamatayon.

Kasinatian

Ang sakit ingon man ang suliran sa panglawas nakaapekto sa kadaghanan kanato.

Kining maong suliran nakaapekto nato ingon nga pamilya, ingon nga parokya ug  katilingban. Ang mga nagmasakiton nagkinahanglan og dako uyamot nga pagtagad gikan kanato.

Kining maong pagtagad makadasig kanila nga magmalig-on panahon sa maong kalisdanan. Sama ni Jesus kita usab magtagad kanila ug magpakabana alang kanila.

Lihok

Karong semanaha duaw sa mga masakiton nga naa sa imong duol o katilingban. Ipasalig kanila nga mag-ampo ka alang kanila.

Pangamuyo

Ginoo, sayud ka sa among mga kaguol, kasakitan ug mga gihambing balatian.

Tabangi kami pinaagi sa imong grasya nga kun mahimo ayohon mo kami apan kun dili man nimo itugot hatagi na lamang kami sa kalig-on pagsugakod ning mong pagsulay sa among kinabuhi.

Ikaw nga buhi ug hari hangtud sa kahangturan. Amen.