EDITORYAL — Pagbawog sa balaod

Layo pa ang eleksyon, wala pa sab ang filing of certificates of candidacies ug kampanya. Apan makita na ang nagkadaiyang mga kandidato ug ilang mga supporters bisan sa pinakasuok nga mga dapit sa mga barangay.

Bisan gani kadtong mga dapit nga dili nila ganahang adtuon nga grabe kahugaw ug nag-ilaid ang kakabus sa mga nagpuyo sa ilang barangay, natultolan man ug walay pagduhaduha nga nakiglamanohay ang mga nangambisyon og posisyon.

Hinuon kun teknikalidad sa balaod maoy hisgutan wala pa silay nalapas nga Election Code kay hangtud nga wala pa sila makaduso og COCs, dili pa sila makonsiderar nga mga kandidato, nagpasabot nga dili pa sila makalapas sa Election Code.

Mao nga samtang wala pa sila magapos sa maong balaod gawasnon silang makapadayag bisan dili direkta sa ilang intensiyon.

Usa kini sa mga buslot sa balaod, basta dili lang mogamit og pulong nga “botari ko” dili kini matawag nga pangampanya. Daghan kaayong mga pulong nga alternatibo niini, mahimong “ayaw ko kalimti,” “kasaligan,”  “kaabag,” ug daghan pang uban.

Usa pa sab sa obserbasyon karon mao ang dayag nga pagpakita sa mga mayor og suporta sa mga potensyal nga kandidato sa barangay ug sa Sangguniang Kabataan.

Ang SK dili man unta politikal ang tumong, apan natakdan na gyud ang maong organisasyon. Kini gimugna aron pagbansay og mga maayong umaabot nga lider ug maayong mga molupyo sa nasud.

Maayo unta og human sila modaog karong eleksyon sa Oktobre,  makatultol sila og bisita balik sa mga hilit nga bahin sa ilang mga barangay.

Mangunay paghatud sa serbisyo didto mismo sa mga sitio ug dili magpaabot lang nga silay adtuon diha sa barangay hall aron dangpan sa mga problema ug yangungo sa mga tawo.

Usa sa mga ilhanan sa maayong botaran mao kadtong kugihan, matinabangon, daling maduolan, pirmeng mopresentar og solusyon ug labaw sa tanan dili badlungon o salawayon sa ilang lugar bisan wala pa sila mokandidato.