Pasma

Ayon sa mga paniniwala, ang pasma ay nagdudulot ng panginginig at pagpapawis ng kamay. Sumasakit at nama­manhid din ang kalamnan. Ngunit sa aking pag-aaral, maraming sakit ang puwedeng magdulot ng sinasabing sintomas ng pasma. Dapat iwasan natin ang mis-diagnosis o maling gamutan.

Kadalasan ito pala ang mga tunay na sakit ng pasyente. Halimbawa:

1. Arthritis – sumasakit, sumisikip at namamanhid ang kamay sa arthritis. Dahil ito sa pag-edad at sobrang gamit ng kamay at katawan.

2. Carpal tunnel syndrome – pamamanhid ng kamay ang sintomas dulot ng sobrang paglaba, at paggamit ng kamay sa trabaho. May naiipit na median nerve dito.

3. Hyperhidrosis – nagdudulot ng sobrang pagpapawis sa kamay at paa. Puwede sa nerbiyos o namamana ito.

4. Lumbar and sacral disease – manhid at masakit ang paa at binti, posible dahil may naiipit na ugat sa likod.

5. Diabetes – nakasisira ng nerves at nagdudulot ng pamamanhid sa paa at kamay.

6. Parkinson’s Disease – nanginginig ang kamay (tremors) at hirap maglakad na parang matutumba palagi.

7. Edema from heart and kidney disease – ang manas ay puwede magmula sa sakit sa puso at kidneys.

8. Varicose veins – nagkakaroon nito kung laging naka­tayo at nakaupo at namamana rin. Gumalaw-galaw at magsuot ng compression stockings.

Huwag balewalain ang mga naturang sakit at sabihin na pasma lang. Dapat matukoy kung anong sakit ito para magamot. Kumunsulta sa inyong doktor.