Panagway sa kalisod ug kalisang

Hilabihan ka louy ang sitwasyon sa mga yanong lungsoranon sa Negros Oriental nga naapil sa gitawag nga Pamplona Massacre, pipila kanila akong nahimamat personal.

Kagahapong adlawa nikuyog ang kami sa mga personnel sa Department of Labor and Employment or DOLE sa pagpanghatag og kabuhayan package sa pamilya sa mga biktima ug mismo sa mga biktima.

Usa kanila si “Jun” dili tinood nga ngalan kinsa naigo ang baba sa bala nga milapos sa iyang aping, naigo usab ang iyang bukton.

Usa si Jun sa nagkuha og ayuda sa balay ni Governor Roel Degamo niadtong March 4 dihang naapil siya pagpamusil, swerte si Jun nga nabuhi pa kay ang laing siyam apil na si Degamo ang nakalas.

Samtang laing pamilya ang nagkalisod human naigo sa tiyan ang iyang bana nga naa pa karon sa ICU sa hospital, limitado ang ilang mga pamahayag kay nagpalabi ang ilang kahadlok.

Dili lang sa  nahitabo kanila ang gikahadlokan kon dili ang kaugmaon sa ilang pamilya kay sagad sa naigo ang gabuhi kanila, mga kabus intawon nga seguradong hilapon ang imong dughan magtan-aw sa ilang mga panagway nga napuno sa kalisang.

Matag  usa ka pamilya gihatagan og 16 ka sakong bugas nga ilang gamiton sa pagsugod sa negosyo, maayo nalang kini kay sa wala apan makapaigo ba kaha ni sa ilang pagsugakod sa kinabuhi?

Nagkinahanglan pa gyud sila og tabang gikan sa kagamhanan, ang na-highlight karon ang nahitabo sa gubernador nga angayan lang usab kay siya man ang amahan sa lalawigan apan angayan lang pud ang patas nga pagtagad sa mga kabus nga biktima.

Unang higayon nga  nakataak ko sa Negros, makaingon ko nga normal ra man ang sitwasyon, nagpadayon ang panginabuhi sa mga tawo, business as usual. Maayo unta kong ingon nalang niini ang tanan, magpadayon nga dili matugaw ang kalinaw, kini pangindahay sa pagkakaron, mahatagan kaha kini og katumanan? basin baya og naay nagpahipi nga mas dakong hulga sa kalinaw sa Negros Oriental.