Ang bodyguard

Sa imbestigasyon nga gipahigayon nasuta nga lima sa unom ka mga bodyguard ni Gobernador Roel Degamo sa Negros Oriental ang absent nianang adlaw nga gipatay ang gobernador.

Si Philippine National Police Chief Heneral Rodolfo Azurin Jr. mipasalig nga walay mahitabong pagtabon sa ilang imbestigasyon sa giingong pagka-absent sa lima ka mga polis. Giklaro sa heneral nga ang pagtabon-tabon dili kabahin sa nagpadayon nilang imbestigasyon.

Ang lima ka mga polis anaa ra ug gikatakda nga moapil sa imbestigasyon nga gipatawag sa Ubos Balay Balauranan.

Ang heneral miklaro nga ang mga polis nga bantay sa gobernador wala magdungan sa ilang duty. Buot ipasabot nga rotation ang ilang duty sa pagbanatay sa gobernador. Sa dihang gipatay ang gobernador anaa lang sa duha ngadto sa tulo ka mga polis ang mag-duty.

Asa man diay tuod ang lima ka mga polis nga bantay sa gobernador dihang siya gipatay?

Si Kongresista Arnulfo “Arnie” Teves Jr. kinsa gitumbok sa mga suspect nga utok sa pagpapatay kang Gobernador Roel Degamo nanghimakak sa pasangil batok kaniya ug miisa sa pangutana nganong sayon ra nga nakasulod sa compound sa panimalay ni Degamo. Buot ipasabot sa kongresista nga kabisado ug kaila ra sa guwardiya sa mga Degamo ang mga mipatay sa gobernador.

Hinuon wala magpasabot nga kay kaila sa mga guwadiya ni Degamo ang mipatay sa gobernador, wala na siyay kalambigitan niini tungod kay puwede ra pod niya nga sugoon ang mga kaila sa gobernador aron kini patyon.

Kun ugaling nalambigit sa pagpatay sa gobernador ang iyang mga bantay dako kining peligro sa mga magbaton og bantay. Gani posible nga wala nay magpabantay.

Kahinumdom lang ko ni RTC Judge Martin Ocampo, ang huwes nga mikonbikto sa mga inila ug dato nga mga akusado sa Chiong nga kaso nga wala siya manginahanglan og bantay kay basin og unayon lang siya sa  pagpatay niini.