Grabiha’s traffic

Dakong kalihokan ang gihimo diha sa EIC Convention Center sa Pope John Paul II Avenue kaniadtong Sabado, nga nakamugna og grabeng traffic sa daghang mga dapit dinhi sa siyudad.

Matud pa nga diha sa EIC gihimo ang oath-taking sa kapin duha ka libo ka bag-ong nurse mao nga pwerteng daghana sa mga sakyanan nga mipaingon sa maong dapit.

Gikan sa may JY Square paingon na sa likoanan paingon sa EIC, halos dili moirog ang mga sakyanan. Naabtan ko og subra sa 30 minutos sa mao nga gilay-on nga mga usa lang ka kilometro.

Wa makadestino og mga traffic enforcers ang Cebu City Transportation Office (CCTO) kay dugay sila gipahibawo nga may dakong kalihokan nga himoon sa EIC niadtong adlawa.

Leksyon kini nato nga angay’ng mo-coordinate ang ubang opisina sa Cebu City Hall ngadto sa CCTO kon adunay mo-apply og permit sa pagpahigayon og susama nga kalihokan.

Daghan pa ang wa makasabot nga kon mag-traffic gani sa usa ka dapit, apektado ang ubang mga karsada kay dili na man makalihok ang mga sakyanan.

Pananglit pareho niadto, kami nga dili motambong sa kalihokan sa EIC naapil nga misunod sa panon, nga wa masayod kon nganong wa moirog ang mga sakyanan.

Unsaon pag-irog nga gikontrolar na man ang mga sakyanan nga mosu’d sa parking area sa EIC kay puno na. Kon mi-coordinate pa unta daan ang EIC ngadto sa CCTO, mahimong dili unta ingon niadto ang kagrabe sa problema sa traffic.

Amo kining hisgotan atol sa miting namo sa Cebu City Traffic Management Board karong Martes kay dili maayo nga masubli ang maong kasinatian.

* * *

Nalipay ko kay nasemento na pagbalik sa JFAP Construction ang ubay-ubay’ng bahin sa karsada gikan sa Busay paingon sa JY Square.

Apan pagka karon, nagsugod na usab sila pagtiwas sa ilang proyekto nga paglubong og mga dagkong tubo sa tubig diha na sa Fulton Street sa Lahug.

Gikuyawan ko nga dugay na usab nila nga mahuman ang pagbutang og mga Pressure Regulating Valve (PRV) sa lainlaing mga dapit sa Veterans Drive, ug makaapekto sa traffic.

Ang wa lang gyud nako magustohi kay kon tawgon nimo ang project engineer sa JFAP nga si Engr. Gab Villanueva, di gyud motubag, o bisan mo-reply na lang pinaagi sa text.

Bisan ang mga opisyal sa MCWD nga maoy nagkuha sa ilang serbisyo wa na makagusto sa ilang kahinay nga motrabaho. Kon may laing proyekto ang MCWD, ayaw na gyud tawon ninyo kuhaa ang serbisyo niining mao nga construction company.