Naa gihapoy nagpakilimos

Nagsingabot na usab ang Pasko. Ang pagpabarog og bag-ong higanteng Christmas tree sa Fuente Osmeña nagpahinumdom nga ania na pod kita niining mga adlaw, diin usag-usa kanato maghunahuna unsay angay andamon nga makapahimo sa atong Pasko nga malipayon, bulahan ug mabulokon?

Ang mga kompaniya, dagko man o gagmay, naningkamot nga makahatag og Christmas bonus sa ilang mga empleyado. Tingale, mogamay ang kantidad human mahiagom ang mga magpapatigayon sa padayon tang giatubang nga krisis, pero maayo na lang kay sa wala.

Sa mga de opisinang kawani, may nagsugod nag pamalit og mga bag-ong sinina, pantalon, tualya ug uban pa, aron maoy pustong pinaskohan para sa ilang mga kinugos. Ang nakalahi lang, kay kon kaniadto gikan gyod sa dagkong malls ang ighahatag nga mga regalo, karon sa Carbon market na lang intawoy kaya sa ilang pitaka.

Halos dili na maduol ang subra ka mahal sa mga palaliton karon. Hinungdan, nga alang sa mga kabos, gikalipay kaayo nila kining mga adlaw paingon sa Pasko. Sanglit, daghan ang pinaskohan sama sa pagkaon, sinina ug salapi ang ilang madawat gikan sa mga manggiluy-ong adunahan, kinsa mao pay modumdom paghatod niini ngadto sa gubaong payag nga ilang gipuy-an.

Apan may mga linalang nga dili makapaabot kanus-a tunolan. Sama sa mga Badjao, kinsa bisag wala pay Pasko, pirmeng makita sa karsada, nagtangkil og gamayng bata ug dili mahadlok mosugat sa manghunong nga sakyanan sa karsada aron lamang manuktok sa bentana ug magpakilimos.

Delikado kining maong matang sa ilang panginabuhi. Ug hagbay ra kining gidili sa atong balaod. Hasol sa dalan kining ilang gihimo. Makadugang sa suliran sa trapiko ug makapaukyab sa dughan.

Tinuoray, gisulayan na sila’g rescue sa atong mga polis. Ug ambot, nganong mamalik gihapon? Gani, niining bag-o, sa may eskina Landers, F. Cabahug Street paingon sa Castle Peak, sa akong pag-agi, may mga Badjao nga padayong nagpakilimos.

Gikapoyan na kaha atong kapolisan sa pag-rescue nila? Unta, dili off and on ang pagbadlong-hipos kanila. Kay sa matag higayon nga sila mapasagdan, sama ra nga nahanaw usab ang balaod. Diin inay sila mahanaw, modaghan-siaw hinuon!

Dili sala ang pagpangayo. Dili sayop ang pagpanghatag. Apan may hustong dapit ug takna alang niini.