Amahan masuko kun pangayoan og sustento

Nagbuwag mi sa akong bana sud na sa duha ka tuig. Usa ra ang among anak ug naa nako ang bata. Ang akong bana mosuporta sa bata apan dili kanunay, masuko pa gyud kun akong pangayu-an. Gusto unta ko nga magpirmahanay mi og kasabutan aron dili siya makalimot sa paghatag sa iyang ayuda sa bata matag buwan apan di man siya mosugot. Unsay angayan nako nga buhaton attorney aron maseguro nga mohatag gyud ang akong bana matag buwan sa iyang ayuda? Asa ko modangop? Daghang salamat. —Vina

* * *

Dear Vina,

Ang una nimong buhaton mao ang pagpadala kaniya og demand letter pinaagi sa imong abogado. Kun dili gihapon siya mohatag bisan kon gipadad-an na og suwat sa abogado, imong ireklamo sa barangay diin siya magpuyo aron siya ipatawag ug aron kamo magka-atubang ug magpirmahanay og kasabutan. Kun dili gihapon siya motunga sa barangay, ang sunod nimo nga buhaton mao ang pagpasaka kaniya og kaso, mamahimo ka nga mo file og criminal case basi sa kalapasan sa Republic Act 9262 kon Anti-Violence Against Women and their Children tungod kay ang pagdumili sa pagsuporta sa anak ug sa asawa usa ka kalapasan sa balaod. Kun mapamatud-an siya sa maong kaso mamahimo siyang mabilanggo. Lain nimong option mao ang pag file og civil case sa korte alang sa pagpangayo og suporta sa bata. Kun ang korte na ang modesisyon, mapugos gyud siya sa paghatag niini kay mamahimo man siya nga i-contempt of court kun dili siya motuman sa maong kamandu-an. Thank you and God Bless! — Atty. Divine

* * *

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.