EDITORYAL - Nabuhi ang SMEs pagbukas sa klase

Sa pagbalik sa face to face classes nakita sab ang pagbalik sa daghang klase-klaseng small-medium enterprises nga nagbaligya og mga gusto ug gikinahanglanon sa mga tinun-an.

Makita karon diha sa mga kilid-kilid sa mga nagkadaiyang eskuylahan, partikular na sa mga pangpublikong tunghaan ang daghan kaayong mga tindahan nga lain-lain og mga baligya.

Apan kasagaran sa ilang mga baligya mga pagkaon, snacks, bugnaw nga ilimnon, prutas ug pipila ka mga school supplies nga medyo mahal og gamay kun itandi sa presyo gikan sa department stores o educational supply stores.

Daghan ang nabuhian og paglaum nga makalingkawas sa danyos nga gibilin sa pandemiya ug sa bagyong Odette dinhi sa Kabisay-an.

Tungod kay nakabalik naman sila pagpaninda ug nabalik sab ang mga bata nga maoy tigpalitan sa ilang mga baligya.

Gawas pa usab niini, nabalik sab ang gidaghanon sa mga pasahero mao nga nabuhi sab og balik ang mga pasaheroan gikan sa modernong PUJs, traditional PUJs, trisikol, trisikad ug bisan mga habal-habal.

Tungod niini, nituyog og balik ang ekonomiya sa mga dapit kun diin nahimutang kining mga eskuylahan.

Sa samang higayon, nikatay kini nga aktibidad ngadto sa ibabaw nga ang-ang sa patigayon kun diin magagikan ang mga supply nga gipamaligya sa mga SMEs.

Kaning mga paninda sa mga kilid-kilid kinahanglan nga siguradong limpyo ug luwas ang ilang mga baligya.

Samtang kini sab untang mga pasaheroan ilabi na ang mga trisikol, habalhabal ug trisikad  dili lang unta magpasobra og singil sa pletihan.

Sanglit dili sab sayon kun pananglitan dunay mahitabo sa mga tinun-an tungod sa kontaminadong pagkaon nga ilang gibaligya.

Samtang dili sab husto nga magpatuyang lang pasaka og pleti ang mga pasaheroan, walay konsiderasyon sa mga estudyante tungod kay walay regulasyon nga nagkontrol kanila.

Anhing dapita kinahanglang mosulod ang mga LGUs aron pagsiguro nga protektado ang mga bata ug sa samang higayon padayon nga makapanginabuhi ang gagmay nga mga negosyante ug mga pasaheroan.