EDITORYAL - Wa nay salig si PBBM?
Nihimo og kausaban si Presidente Ferdinand Marcos Jr. sa mga maglangkob nga miyembro sa National Security Council sa nasud pinaagi sa Executive Order No. 8.
Ang mga miyembro sa NSC naglangkob sa mga kalihim sa gabinete, mga lider sa nagkadaiyang komitiba Ubos Balay Balauranan ug sa Senado, mga pangulo sa militar ug kapolisan, ug pipila ka pinili nga sibilyan.
Nagpasabot kini nga tanang miyembro sa NSC kasaligan ug masandigan sa pangulo pagsagubang sa mga hulga ug pagpangita og mga solusyon pagsulbad niini.
Sa kausaban nga gihimo ni Marcos gibase sa susamang giisyu kaniadto ni kanhi presidente Gloria Macapagal-Arroyo nga EO-34.
Apan sa bersyon ni Marcos gawas sa ubang giusab, gitangtang na isip miyembro ang bise presidente ug ang nanglabay nga mga pangulo sa nasud.
Nagpasabot ba kini nga wala nay salig si Marcos kang Bise Presidente Sara Duterte ug sa amahan niyang si kanhi presidente Rodrigo Duterte?
Normal ra sab tingali ni nga reaksyon sa pangulo human aning nakalabay nga mga buwan nagkabangi sila sa kampo sa kanhi kaalyado sa UniTeam.
Apil sa hisgutan sa matag tigum sa NSC mao ang seguridad sa gobiyerno, sa katawhan, sa teritoryo sa nasud ug soberiniya niini batok sa tanang matang sa hulga sa nasudnong seguridad.
Si kanhi presidente Duterte daan nang gidudahan sa iyang mga polisiya mahitungod sa isyu sa West Philippine Sea nga karon gusto gyung ilugon sa China. Tungod sa kasuod niya sa China ug sa mga lider niini.
Si Marcos, gikan sa iyang paglingkod nangusog nga maprotektahan ang mga teritoryo diha sa WPS. Ang kanhi pangulo sab kun kahinumdoman niawhag sa militar paghimo og aksyon aron palagputon si Marcos.
Sa pikas bahin, ang iyang anak nga si VP Duterte mipublikar gyud sa iyang paghulga sa kinabuhi ni Marcos, First Lady Lisa Araneta Marcos ug House Speaker Martin Romualdez nga diin iyang giangkon duna na siyay gikaestoryang hitman aron patyon ang tulo kun dunay dautang mahitabo kaniya.
Samtang tinuod kining tanan may bulok politika ani, dili ikalimod nga kun dunay dagkong panghitabo sa nasud, maayo man o dili, ang numero unong maapektahan mao ang publiko.
- Latest
