Barato nga tubig

Ang tubig nga gikunsumo nato gikan sa Metropolitan Cebu Water District barato ra gyud kaayo kon itandi nimo sa ubang mga tigbaligya og tubig dinhi sa Metro Cebu.

Gani, ang katapusang higayon nga mihimo og water rate adjustment ang MCWD, kaniadto pa’ng 2015, bisan og gitugotan na unta sila sa Local Water Utilities Administration paghimo’g laing umento niadtong tuig 2020.

Matud ni MCWD Chairman Joey Daluz III nga nahukman nilang dili magpaumento niadtong 2020 kay malooy sila sa katawhan kay pandemic man.

Apan karon nga mohapit na walo ka tuig gikan sa 2015, makiangayon lang tingali nga mopaumento na sab sila sa water rate kay kon dili, maut-ot intawon sila kay dili makasustiner ang ilang kita kon itandi sa mga gastohan.

Gipahibawo sa MCWD nga mopausbaw sila sa bayranan, aan unya pa sa Hulyo sunod tuig. Ang minimum karon nga bayranan nga P152, mahimo na unya nga P243.20.  Barato ra.

Makapalit man gani ta og mga ilimnon nga mahal na kaayo, ug sigarilyo nga igo lang sunogon, tubig pa ba nga ato gyud nga gikinahanglan?

* * *

Ayaw mo kahibulong nga paspas karon ang pagpang-clamp sa mga sakyanan nga masakpan nga iparada lang daplin sa mga karsada, sa ato pa “overnight parking.”

Dunay uban nga bisan og kapila na ma-clamp, sige lang gihapon. Timan-i nga lahi na karon kay sa una ha? Pananglit kanang gamay’ng karsada paingon sa GMA-7 Complex duol sa Barangay Hall sa Busay, ayaw gyud na diha parkingi og sakyanan.

Madak-an gyud mo sa gasto kon magsige lang og bayad sa multa. Pangita na lang og lugar nga adto iparking ang inyong sakyanan.

Bisan panahon sa adlaw, paspas ang operations sa PNP Traffic Enforcement Unit ug mga Traffic Enforcers, kay gituyo na aron hapsayon ang atong kadalanan.

Nahukman usab sa Cebu City Traffic Management Coordinating Committee (Traffic Board) nga gipangulohan ni Atty. Francis Rey “Koko” Holganza nga estriktohon na gyud ang pagpatuman sa ordinansa kabahin sa Jeepney Stops.

Kinahanglan nga ang mga driver adto ra gyud mohunong sa mga Jeepney Stop aron mopakanaog ug mopasakay og pasahero. Giawhag sab ang mga pasahero nga adto mo paghuwat og kasakyan sa mga Jeepney Stop.

Ang masakpan nga molapas sa gilatid sa ordinansa, pagamultahan. Daghan pa kaayong kausaban sa pagdumala sa traffic dinhi sa siyudad nga ipatuman pipila ka adlaw gikan karon.

Unya, sa mga traffic enforcers nga badlongon, ilabi na kadtong dunay mga binuang, undanga na ninyo kay para makapadayon mo sa pagtrabaho.

May uban ra ba nga traffic enforcers kay mag-adtoan sa mga truckers aron mangayo og kwarta, magsakay pa og patrol.