EDITORYAL - Panahon na umentohan ang suholan

Nangayo karon og umento sa suholan ang nagkadaiyang mga labor groups nunot sa pagsaka karon sa mga presyo sa palaliton, epekto sa nagpadayong gubat didto sa Eastern Europe.

Tungod sa maong gubat misaka ang presyo sa produktong petrolyo sa kalibotanong merkado. Tungod sab niini, misaka sab ang mga presyo sa halos tanang palaliton apil ang mga batakang panginahanglan.

Apan samtang nagkataas ang presyo sa petrolyo, walay kausaban o pagsaka ang suholan sa mga mamumuo dinhi sa kabisay-an.

Tungod niini, ang mahibilin sa ilang gamay’ng sweldo human kuhai sa mga deductions mao nalay paiguon sa mga mamumuo. Kuhaan pa gyud sa ilang mga utang sa gawas, bayad sa bills, abang sa balay, ug uban pa, wala nay mabilin.

Ang Trade Union Congress of the Philippines nangayo og P430 nga umento sa inadlaw-adlaw nga suholan. Samtang laing grupo sab ang nangayo sab og kaugalingong umento puno sa inadlaw nga minimum wage. Tukionon pa sa Regional Tripartite Wage Productivity Board-7 ang maong gipangayo nga umento. Ang usa sa mga basihanan aron tugotan paghusay kining gipangayong umento kini kun dunay gitawag og intervening reason o bug-at nga rason aron ihatag ang gipangayo.

Murag panahon  gyud tinuod nga usbawan ang kasamtangang suholan tungod sa kalisdanang gibilin sa pandemiya, bagyong Odette ug ning higayona ang krisis sa kalibotan dala sa gubat didto sa Eastern Europe.

Sobra duha ka tuig na dihang kataposang nakatilaw og wage increase ang mga mamumuo dinhi sa Kabisay-an. Angay sab hinumdoman sa mga mamumuo nga ang mga magpapatigayon apektado sab sa krisis karon, magsinabtanay lang unta kung unsa may madesisyonan sa RTWPB. Basta makatarunganon lang ang gipangayo ug aprubahang umento nga dili mayabo ang mga patigayon ug makasugakod ang mga mamumuo paigo na kini.