Kon ang dumuduong

Nahimong kabahin sa atong kultura isip mga Filipino ang pagdawat og mga dumuduong sa atong tagsatagsa ka mga pinuy-anan. Hinuon kasagaran nila atong kaila, higala, paryente nga moduaw kanato matag karon ug unya.

Si San Benito nagtudlo kanato nga kun ang maong dumuduong nakahatag og inspirasyon ug kadasig sa tagbalay angayan lamang nga ato siyang hawiran aron molanat og dugay ang iyang pagpuyo kuyog nato.

Kini aron kita nga iyang giduaw ang makakat-on sa iyang mga birtud ug pinaagi sa pagkat-on niini mamahimo kitang mga maayong tawo segun usab sa pagtulon-an ug panig-ingnan nga gipakita sa maong dumuduong.

Sa laing bahin, matud pang San Benito ang dumuduong nga walay hinungdan sa ngalan sa gugma sa mga inosente nga sakop sa katilingban ang kinahanglang papahawaon aron dili makaamong sa kadaghanan nga naningkamot nga makab-ot ang kinabuhing tarong ug husto.

Angayan lamang nga sila mopahawa. Angayan lamang nga sila mawala.

Kining maong pahimangno nagdasig man kanato:

1. Nga sa kinabuhi nato, mahinungdanon ang maayong tuyo. Ang maayong tuyo Makita man sa paagi nga kita nisud-ong sa atong palibot.

2.  Ang pribadong luna sa atong pagkatawo kinahanglang atong panalipdan gikan sa bisan unsang makahilo.

3. Ang bisan unsang makapahamtong kanato ingon nga tawo ug Kristiyano angayan lamang nga atong dawaton mismo sa atong kaugalingong luna. Ang bunga niini makapadasig kanato sa kinabuhi.

Mahimong atong mahatag ngadto sa uban ang atong kamaayo apan dili sa tanang panahon anaa ang kompiyansa. Dunay mga higayon nga kita magmaigmaton.