EDITORYAL - Hustisya alang sa tanan

Naukay ang social media sa nahitabo sa usa ka dalagang flight attendant nga napalgang patay sud sa usa ka condominium unit didto sa Manila.

Nahimo kining dakong isyu tungod sa ka high-profile niini kay naglambigit og dili basta-bastang indibidwal ang biktima ug ang mga gitumbok nga suspek.

Paspas kaayo ang dagan sa estorya ug apil sa nalambigit nga mga gidudahan ang anak sa usa ka sikat nga Cebuana personality. Dili man ingon niini kakusog ang kasikas kun pobre pa ug wa mailhi ang mga nalambigit. Mao ni presyo sa kasikat sa tawo.

Samot nga nahimo init ang isyu human dunay mga netizens nga gibasol pa ang biktima sa nahitabo kaniya. Nga daw siya pa moy hinungdan nganong naabot sa ingon niana ang sitwasyon.

Dili kini makatarunganon sa habig sa biktima. Dili sala sa biktima nga mosalig kay dili niya kasalanan nga siya buotan ug maabi-abihon.

Kung moinom ang babaye, ngano man diay? Ang gikinahanglan mao ang respeto. Kung may respeto sa isi’g ka tawo way krimen.

Samtang samang paagi, gilatos sab og maayo sa netizens ang mga gitumbok nga suspek.

Ang uban kanila naa na sa kustodiya sa kapolisan ug duna pay laing gipangita. Wala pa gani sila mataral sa hukmanan ug nadungog ilang habig  gihukman na silang daan sa mga tawo ug gilatos sa social media.

 Nasunod ba kaha ang due process kanila? Kung sad- an, maayo gyud silang masilotan apan kinahanglang pinaagi sa korte ug di sa social media.

Dali ra kaayong mamasangil ug mokondenar og tawo apan siguraduhang mapamatud-an kini didto sa korte.  Ang sakit niini, bisan inosente parehas ra og kauwawan nga mahiaguman sa mga tinud -anay nga sad an. Angay tingali nga ang kapolisan maoy unang mosiguro nga ang tanan gibuhat pinasubay sa proseso nga way pagdapig.  Nga ang katungod sa biktima ug sa mga gisuspetsahan maproteksyonan hangtud nga mapamatud- an sa hukmanan.

 Kinahanglang neutral sila. Nga gusto sab nilang mahatag ang hustisya para sa kung kang kinsa ug dili para magpasikat lang o nag apas og pagdayeg.