Sama sa usa ka damgo

Gidasig ni Presidente Ferdinand Marcos, Jr., ang katawhang Pilipino, nga dili mohunong sa pagdamgo kay ang gobiyerno mobarog uban sa katawhan sa ilang paningkamot pagpa-usbaw sa kahimtang sa ilang kinabuhi. Gihimo ang maong pagdasig atol sa paglusad sa implementing rules and regulations (IRR) sa Expanded Tertiary Education Equivalency and Accreditation Program (ETEEAP) Act. Ang pagdamgo sa tingusbawan maayo man apan kinahanglan nga ang hintungdan andam nga mobayad sa “kantidad” nga gikinahanglan alang sa katumanan sa iyang damgo. Kay kon dili, basin mahisama ra ang iyang pangandoy sa linya sa awit nga nagkanayon, “Sama sa usa ka damgo, nahanaw lang usab pagmata.” Muleeng!

Putlan og tudlo

Mipasidaan ang Malacañang nga mahimong mapahamtangan og silot kadtong mga opisyales sa kagamhanan nga mosumiter og mga bakak nga project accomplishments report labi na kon dili nila mapasabot ang maong kasaypanan. Daw naandan na man kini nga buhat sa mga opisyal sa kagamhanan ang pagsumiter og mga bakak nga accomplishment reports sa tuyo ba kaha nga matabunan ang ilang pagpangawkaw sa pundo ingon man mahatagan usab sila’g pasidungog.  Matud pa sa akong amigo, “Dili paigo ang silot nga taktakon lang sila sa trabaho. Mas maayo tingale nga putlan sad sila og tudlo aron mailhan sa katilingban nga sila mga corrupt ug bakakon.”  Fezteleern!

“Sira-sira store”

Segun sa Department of Trade and Industry (DTI) magpabilin nga usa ka mahinungdanon’g magtatampo sa ekonomiya ang mga sari-sari stores ug gibana-bana kini mga maka-generate og mokabat P2 trillion nga halin sa tuig 2030. Kining mahinundanon nga papel sa mga sari-sari store ngadto sa atong ekonomiya nag-atubang usab og mga hagit sama sa kakulang sa capital ingon man sa kahanas pagdumala niini sa mga tagtungod.  Maoy hinungdan nga, tungod sa  kakulang sa puhonan, daghan ang mga sari-sari store ang matak-upan lang sa kapulihay ug tawgon na lang nga, “Sira-sira store.” Madahaan!

Tambok apan apyogon

Gipasidan-an ni PNP Chief Gen. Nicolas Torre III kadtong mga overweight nga police officers nga aduna na lamang silay usa ka tuig sa pagpakunhod sa ilang mga timbang kay kon dili, mahimong mapalagpot sila sa ilang katungdanan sa PNP.  Mahinungdanon sa usa ka police officer nga mamentinar ang hustong pamayhon aron mapakita nga adunay disiplina ang kapolisan.  Daghan tinuod sa atong kapolisan nga nagbusyad lang ang mga tiyan ug tataw nga dili na makagukod sa kawatan.  Matud pa bitaw sa panultihon, “Mas maayo pa ang niwang apan bingkol kay sa tambok apan apyogon.”  Pagkatuytoy!

Trust fund

Mipagawas og memorandum si outgoing Cebu Governor Gwendolyn Garcia nga nagmando sa Cebu Provincial Treasurer sa pag-establisar og trust fund alang sa dili momenus 15 ka mga proyekto ug programa.  Kon unsa man ang tinuod nga katuyoan niini, ang pundok lang ni Gob. Gwen ang nasayod apan alang sa mga tigpaniid, usa kini ka pagmaniobra sa pundo aron dili makalihok sa yano ang mosunod nga administrasyon.  Matud pa’s akong amigo, “Mora’g manok nga Texas ang gobernadora, bisan samaran na apan motusik lang gihapon.”  Atala lagee!