Pagtinabangay atol sa kalisod

Mapalandong ko ang inyong pamilya, nagpuyo sa di kasarangang kinabuhi aron paglikay sa sakit. Naghunahuna ko sa kadasig sa mga bata ug mga batan-on, nga di makapuyo sa ilang kinabuhi. Gibatyag sa akong kasingkasing ang tanang pamilya, labi nang may mga masakiton o nagbangotan tungod sa coronavirus o laing mga hinungdan. Naghunahuna ko sa mga nag-inusara. Naghunahuna ko sa mga hamtong.

Nahibawo ko sa kamanggihatagon sa mga nagsakripisyo pagtambal sa mga masakiton o pagpangalagad sa katilingban. Labihan kadaghang bayani, matag adlaw, matag takna! Nahinumdom ko pilay naapiki sa panalapi. Nahunahuna sab nakong mga binilanggo, kansang pag-antos nasamotan sa kahadlok sa epidemiya; naghunahuna ko sa mga way panimay nga makapanalipod nila.

* * *

Ang Santo Papa nahibawo sa kalisod ug gustong mopahibawo sa tanan sa iyang paghigugma. Mosuway ta paghimo sa labing maayo ning higayona: magmanggihatagon ta; atong tabangan ang kabos natong mga silingan; atong pangitaon ang mga labing masulub-on, pinaagi sa telepono o social media; mangaliya ta sa Ginoo alang sa tanang nagkalisudlisod.

Bisan nabuwag ta, ang paghunahuna ug espiritu makaabot og layo uban ang kamamugnaon sa gugma. Mao ni atong gikinahanglan karon: ang kamamugnaon sa gugma.

* * *

Atong balaanon sa di kasarangang paagi ang Semana Santa, nga naglangkob sa way kinutobang gugma sa Ginoo. Ug sa kahilom sa atong mga dakbayan, molanog ang Ebanghelyo sa Pagkabanhaw. Si Apostol Pablo nagkanayon: “Ug namatay siya alang sa tanan, nga ang mga nabuhi di na magpakabuhi alang sa ilang kaugaligon, apan alang Niya Kinsa namatay alang nila ug nabuhi pag-usab.”

Sa nabanhawng Hesus, ang kinabuhi nipukan sa kamatayon. Kining pagtuo sa pagkabanhaw maoy mopalig-on sa atong paglaom. Kini ang paglaom nga makalingkawas ning kalibotanong sakit. Kini ang paglaom: ang paglaom di mopakyas.

* * *

Uban sa usag usa, sa gugma ug pailob, makaandam ta sa mas maayong ugma. Pakita og timaan sa pag-amuma sa mga nag-antos, ngadto sa mga bata, ug ngadto sa mga hamtong. Sultihi sila nga ang Santo Papa duol nila ug nangaliya, nga ang Ginoo sa di madugay mohaw-as nato gikan sa kadaotan.

(Mao ni ang mapangahason nakong hubad sa Binisaya sa mensahe ni Pope Francis alang sa Semana Santa.)

* * *

[email protected]