EDITORYAL - Daghan ang gahi’g ulo

Walay laing tumong ang gobiyerno hasta na ang mga lokal nga kagamhanan kondili ang pagpakgang sa padayong pagtakod-takod sa novel coronavirus (COVID19) sa katawhan. Tungod niini, dunay mga gipatumang quarantine, curfew, health checkpoint, ug gipasirado ang pipila ka dili kaayo importanteng mga balay patigayon gawas lang sa pagkaon, tubig ug medisina.

Apan murag dili tanan nakasabot kun unsa ka seryuso ang hulga sa maong sakit, duna pay uban  nagbugalbugal ug gibandilyo pa sa ilang mga social media accounts.

Normal ra sab kining panagtigi sa mga opinyon ug komentaryo sa mga netizens sa mga isyu bahin sa COVID-19. Sa demokratikanhong nasud, ang tanan adunay katungod sa pagpadayag. Natural lang sab nga dili tanan parehas og opinyon basta dili lang fake news ug padugang sa kahadlok sa katawhan, hala padayon basta magrespetahay lang.

Maayo ang tumong sa gipatumang 24-oras nga pagdili sa mga bata ug sa mga 65 anyos pataas sa paggawas-gawas sa ilang balay dinhi sa Cebu City ug sa tibuok Probinsya sa Sugbo. Apan wala kini natuman sa pipila ka barangay. Tinuod ini og gabii, nimenus gyud ang maggawas-gawas tungod kay aktibo man anang mga orasa ang mga polis ug mga tanod sa pagbadlong.

Apan ini og ka buntag, manggawas man gihapon ang mga tiguwang ug mga bata. Asa naman diay ang 24-oras nga mando nga ‘stay home?’ Angay hinumdoman sa mga Sugboanon nga wala pa gipaubos ang tibuok probinsya ug ang Cebu City sa lockdown. Luag pa kaayo kini.

Gitugot pa ang mga biyahe, pagtambong sa trabaho, makapalit og supply sa pagkaon ug uban pang panginahanglanon basta sundon gyud ang social distancing ug mga protokol. Kun padayong magmagahi ang mga tawo pagtuman sa ilang gusto, unya modaghan hinuon ang mga matakdan, kinsa may basulon kun pahugtan ug himuon na hinuong total lockdown ang tibuok lugar?

Patuo mo mintras ingon ani pa ang mando, para kini dili modaghan ang mangatakdan. Kay kun makita sa gobiyerno nga  padayon ang tinakdanay, natural momando gyud sila og lockdown, unya kinsa may nakapangandam ninyo ani?